Filmi biografik “Michael”, i kushtuar ikonës së muzikës Michael Jackson, ka arritur një sukses të menjëhershëm në arkë, duke debutuar me 97 milionë dollarë në tregun vendas dhe duke vendosur një rekord të ri për filmat biografikë muzikorë. Prodhimi i Lionsgate ka tejkaluar ndjeshëm hite të mëparshme si “Straight Outta Compton” dhe “Bohemian Rhapsody”, duke u pozicionuar si hapja më e fortë e këtij zhanri.
Performanca ndërkombëtare ka qenë po aq mbresëlënëse, me 120.4 milionë dollarë të arkëtuara jashtë SHBA-së, çka e çon totalin global në 217.4 milionë dollarë. Ky rezultat konfirmon interesin e madh të publikut për historinë e “Mbretit të Popit”, pavarësisht polemikave që kanë shoqëruar figurën e tij ndër vite.
Filmi është përballur me sfida të shumta gjatë prodhimit. Një gabim i kushtueshëm në strukturën e skenarit detyroi ekipin të shkurtojë pjesë të rëndësishme dhe të realizojë rixhirime që kapën vlerën deri në 50 milionë dollarë. Në versionin përfundimtar, rrëfimi ndalet në vitin 1988, duke shmangur periudhën e akuzave që kanë njollosur reputacionin e Jacksonit.
Pavarësisht vlerësimeve të ulëta nga kritikët, me vetëm 38% në Rotten Tomatoes, publiku ka reaguar ndryshe, duke e vlerësuar filmin me notën “A-”. Kostoja totale e prodhimit i afrohet 200 milionë dollarëve, ndërsa suksesi në arkë ka rritur pritshmëritë për një vazhdim të mundshëm.
