Grindja e ashpër dhe e gjatë disavjeçare midis Elon Musk dhe CEO-s së OpenAI, Sam Altman, tani po zhvendoset nga mediat sociale në sallat e gjyqit. Dy ish-kolegët do të përballen në një gjykatë federale në Kaliforni të martën në një gjyq njëmujor që mund të përcaktojë rrjedhën e së ardhmes së inteligjencës artificiale. Musk akuzon Altman për mashtrim financiar dhe braktisje të misionit origjinal jofitimprurës të OpenAI , duke kërkuar miliarda dollarë dëmshpërblim dhe ndryshime rrënjësore në menaxhimin e kompanisë. OpenAI i mohon akuzat, duke thënë se Musk është i motivuar nga xhelozia dhe po përpiqet të dëmtojë një konkurrent kyç.
Musk ka ngritur gjithashtu një padi kundër OpenAI dhe bashkëthemeluesit dhe presidentit të saj, Greg Brockman , si dhe kundër Microsoft , të cilin e akuzon për ndihmë në planin për komercializimin e kompanisë akuza që Microsoft i mohon.
Musk po kërkon miliarda dollarë në atë që avokatët e tij e quajnë “fitime të pajustifikuara”, të cilat ai dëshiron t’i përdorë për të financuar krahun jofitimprurës të OpenAI, ndërsa kërkon ndryshime rrënjësore në kompani, përfshirë shkarkimin e Altman. Musk dhe Altman do të jenë midis atyre që dëshmojnë në një çështje që mund të vërë në rrezik të ardhmen e inteligjencës artificiale. Dhe ndërsa njëri prej tyre ka të ngjarë të dalë fitimtar, asnjëri nuk ka të ngjarë të dalë i padëmtuar.
“Musk dhe Altman janë kaq të mëdhenj, kaq të ekzagjeruar dhe kaq të paarritshëm”, thotë Sarah Federman , një profesoreshë në Universitetin e Kalifornisë, San Diego, e specializuar në zgjidhjen e konflikteve. “Kjo është ajo që i bën ata kaq interesantë për t’u parë ndërsa përplasen.”
OpenAI u themelua nga Musk dhe Altman në vitin 2015 si një organizatë jofitimprurëse me qëllim zhvillimin e inteligjencës së përgjithshme artificiale ( AGI ) në dobi të njerëzimit.
Të dy thuhet se u takuan në vitin 2012 përmes një investitori nga Silicon Valley. Altman, i cili ishte ende në të njëzetat dhe 14 vjet më i ri se Musk, ia propozoi idenë për OpenAI kreut të Tesla dhe SpaceX. Në atë kohë, sipërmarrësi miliarder ishte në kulmin e ndikimit të tij përmes Tesla dhe SpaceX, ndërsa Altman ishte i njohur kryesisht në rrethet e Silicon Valley.
Në OpenAI, të dy burrat punuan së bashku në harmoni dhe ndanin të njëjtin besim në potencialin e teknologjisë. Në fakt, në një paraqitje të përbashkët në një konferencë në vitin 2015, Musk deklaroi se inteligjenca artificiale ishte e vetmja teknologji që “mund ta ndryshonte më shumë njerëzimin “, por shtoi se ishte “shumë e dyshimtë” dhe “plot vështirësi”. Transformimi i OpenAI në një strukturë fitimprurëse shkaktoi përçarjen. Musk u largua në vitin 2018 pas mosmarrëveshjeve mbi kontrollin e kompanisë, duke akuzuar udhëheqjen se kishte tradhtuar misionin fillestar.
“Djema, jam i ngopur,” shkroi Musk në një email disa muaj para largimit të tij. “Ose bëni diçka për veten tuaj ose vazhdoni me OpenAI si një organizatë jofitimprurëse. Unë nuk do ta financoj më OpenAI derisa të bëni një angazhim të fortë për të qëndruar në pozicionet tuaja, ose do të jem thjesht një budalla që në thelb ju jep fonde falas për të ndërtuar një startup.”
Në vitin 2022, OpenAI filloi revolucionin e IA-së për konsumatorët me lançimin e ChatGPT , i cili revolucionarizoi angazhimin e përdoruesve, duke arritur 100 milionë përdorues aktivë mujorë brenda pak muajsh.
Polemika u përshkallëzua për shkak të suksesit të ChatGPT, i cili shënoi shpërthimin e inteligjencës artificiale të konsumatorëve. Musk, i cili themeloi kompaninë e tij të inteligjencës artificiale, xAI, argumenton se OpenAI tani u shërben interesave komerciale, kryesisht Microsoft.
Ai ngriti padi në vitin 2024, duke pretenduar se kishte investuar rreth 40 milionë dollarë dhe ishte mashtruar. Nga ana e saj, OpenAI argumenton se Musk u përpoq vazhdimisht të fitonte kontrollin e kompanisë. Vitin e kaluar, Musk dhe një grup investitorësh ofruan të blinin asetet e OpenAI për 97.4 miliardë dollarë. Kompania u vlerësua në 157 miliardë dollarë në një raund të fundit financimi. OpenAI e refuzoi ofertën dhe Altman më pas postoi përgjigjen e tij në Platformën X: “Jo faleminderit, por ne do ta blejmë Twitter për 9.74 miliardë dollarë nëse dëshironi.” “Mashtrim”, u përgjigj Musk në një koment në postimin e Altman.
Gjyqi është përshkruar si një “përplasje titanësh”, me ekspertët që e krahasojnë atë me një përballje “King Kong kundër Godzilla”. Të dyja palët pritet të paraqesin dëshmi të gjera, përfshirë edhe nga CEO i Microsoft, Satya Nadella , ndërsa ish-shkencëtarët e OpenAI, Mira Murati dhe Ilya Suchkever, do të dëshmojnë gjithashtu , si dhe ish-anëtarja e bordit të OpenAI, Siobhan Zillis, e cila është gjithashtu nëna e katër fëmijëve të Musk.
Detajet pikante rreth jetës private të dy miliarderëve kanë dalë prej kohësh në dritë përpara gjyqit, ndërsa avokatët e tyre debatojnë se cilat prova dhe dëshmi duhet t’i paraqiten jurisë.
