Vora ka vendosur të shpërblejë maksimalisht skuadrën pas suksesit historik në Rrogozhinë ndaj Egnatias.
Klubi ka “hapur qesen”, duke shpërndarë një premio totale prej 10 milionë lekësh për ekipin, si vlerësim për fitoren e rëndësishme në transfertë. Ky shpërblim vjen si një motivim i fortë për lojtarët dhe stafin teknik, në një moment kur Vora po kërkon të forcojë ambiciet e saj dhe të konsolidojë projektin sportiv.
Fitorja në Rrogozhinë u konsiderua një nga rezultatet më të rëndësishme të sezonit për klubin, duke i dhënë edhe më shumë peshë këtij vendimi financiar. Burime pranë ekipit bëjnë me dije se shpërblimi është ndarë mes lojtarëve dhe stafit, si një mënyrë për të vlerësuar kontributin kolektiv në këtë sukses.
Atmosfera në kampin e Vorës është mjaft pozitive, ndërsa ky gjest i drejtuesve shihet si një sinjal i qartë mbështetjeje për objektivat e ardhshëm.
