Aktorja e njohur Charlize Theron ka folur hapur për jetën e saj personale gjatë një paraqitjeje në The Drew Barrymore Show, ku promovoi gjithashtu filmin e saj më të fundit Apex.
Gjatë intervistës, përveç diskutimeve mbi projektin e ri, Theron ndau reflektime të sinqerta mbi marrëdhëniet dhe mënyrën si i sheh ato në këtë fazë të jetës së saj. Ajo pranoi se, pavarësisht përvojave të mëparshme në lidhje serioze, nuk është e bindur nëse do të donte të bashkëjetonte sërish me dikë.
“E them me të vërtetë, edhe pse shumë njerëz mendojnë se po bëj shaka, nuk mendoj se mund të jetoja përsëri me dikë. Nuk jam e sigurt nëse mund ta bëja përsëri”, u shpreh aktorja.
Megjithatë, kjo nuk do të thotë se ajo ka hequr dorë nga ideja e një lidhjeje të afërt. Përkundrazi, Theron tregoi se preferon një formë tjetër të marrëdhënies, ku partneri është pranë, por jo domosdoshmërisht nën të njëjtën çati.
“Do të doja që ai person të ishte afër, le të themi se blen një shtëpi në të njëjtën rrugë”, shpjegoi tutje.
Aktorja theksoi gjithashtu se ky qëndrim mund të lidhet me faktin që vajzat e saj janë ende duke jetuar me të, duke ndikuar në prioritetet dhe mënyrën si e organizon jetën personale.
“Ndoshta është sepse vajzat e mia janë ende në shtëpi, kështu që do të ndryshojë kur të rriten dhe të largohen. Por tani për tani po kërkoj diçka shumë specifike”, përfundoi Theron.
