Një përplasje e fortë ligjore ka shpërthyer në industrinë e modës, ku një dizajnere nga New Yorku ka paditur gjigantin Skims, markën e themeluar nga Kim Kardashian, duke e akuzuar për përdorim të padrejtë të një emri tregtar.
Sipas padisë së depozituar në Gjykatën Federale në New York, biznesi i vogël “Fits Everybody To A T”, në pronësi të Denise Cesare, pretendon se kompania miliardere ka kopjuar emërtimin për koleksionin e saj shumë të suksesshëm “Fits Everybody”. Cesare thotë se ajo e ka përdorur këtë emër vite përpara se Skims të ekzistonte, duke e ndërtuar markën e saj nga zeroja.
Dokumentet ligjore theksojnë se Skims ka vijuar me lançimin e linjës pavarësisht paralajmërimeve të përsëritura për shkelje të mundshme të markës tregtare. Madje, koleksioni në fjalë është kthyer në një nga më fitimprurësit për kompaninë, duke gjeneruar qindra miliona euro të ardhura. Avokatët e Cesare e cilësojnë rastin si një shembull tipik të “konfuzionit të kundërt”, ku një kompani e madhe dominon tregun me një emër të ngjashëm, duke lënë në hije biznesin më të vogël që e ka përdorur më herët.
Nga ana tjetër, përpjekjet e Skims për të regjistruar zyrtarisht markën “Fits Everybody” janë refuzuar nga autoritetet amerikane, pikërisht për shkak të rrezikut të konfuzionit tek konsumatorët.
Dizajnerja 61-vjeçare kërkon dëmshpërblim financiar, ndalimin e përdorimit të emrit dhe dorëzimin e fitimeve të realizuara nga kjo linjë. Nëse gjykata vendos në favor të saj, Skims mund të përballet me humbje të mëdha financiare dhe të detyrohet të tërhiqet nga një prej produkteve më të suksesshme.
