Në javën e 35-të të Serie A, Inter siguron matematikisht titullin kampion, ndërsa gara për një vend në Champions League bëhet gjithnjë e më e fortë dhe e paparashikueshme. Katër skuadra ndahen nga vetëm pesë pikë në zonën nga vendi i tretë në të gjashtin: Milan kryeson këtë grup me 67 pikë, i ndjekur nga Juventus me 65, Roma me 64 dhe Como me 62.
Protagoniste e javës është Roma, që jep një sinjal të fortë duke mposhtur bindshëm Fiorentina me rezultatin 4-0. Verdhekuqtë e nisin vrullshëm takimin dhe kalojnë në avantazh në minutën e 13-të me Mancinin, që realizon me kokë pas goditjes nga këndi të Pisillit. Vetëm katër minuta më vonë vjen edhe goli i dytë, një goditje e saktë e Wesley-t për 2-0. Roma nuk ndalet dhe gjen edhe golin e tretë me Hermoso, pas asistit të Koné. Në pjesën e dytë, Fiorentina tenton të reagojë, por në minutën e 58-të Pisilli vulos gjithçka me golin e katërt pas një aksioni të bukur të nisur nga Malen. Një fitore që e çon Romën vetëm një pikë larg zonës Champions, me tre javë ende për t’u luajtur.
Në ndeshjen tjetër të së hënës në Serie A, Lazio rikthehet te fitorja duke mposhtur në transfertë Cremonese me rezultatin 2-1, pas një përmbysjeje dramatike. Janë vendasit që kalojnë të parët në avantazh në minutën e 29-të me Bonazzolin, duke përfituar nga një gabim në mbrojtje. Lazio reagon në pjesën e dytë, ku zëvendësimet e trajnerit Sarri rezultojnë vendimtare. Në minutën e 53-të, Isaksen barazon pas asistit të Noslin. Kur gjithçka dukej se po shkonte drejt barazimit, në minutën e 92-të është pikërisht Noslin që realizon një supergol dhe i dhuron tre pikët ekipit të tij.
Me këtë fitore, Lazio ngjitet në vendin e tetë me 51 pikë, duke lënë pas Bologna dhe Sassuolo. Ndërkohë, Cremonese mbetet në zonën e rrezikut dhe sheh gjithnjë e më afër rikthimin në Serie B, ndërsa gara për mbijetesë mbetet po aq e hapur sa ajo për Europën.
