Aktori i njohur spanjoll, Javier Bardem, ka folur së fundmi në një intervistë për revistën Variety, ku ka shpjeguar arsyet pse ka vendosur të shprehë publikisht mbështetjen e tij për popullin palestinez në konfliktin në Gaza. Ai tha se, ndryshe nga shumë figura të tjera publike që kanë zgjedhur të mos flasin, ai nuk mund të qëndrojë në heshtje për atë që e konsideron një situatë të rëndë humanitare.
Bardem u shpreh se pyetja e vërtetë nuk është pse dikush flet, por pse dikush zgjedh të mos flasë kur ka mundësi dhe platformë për ta bërë këtë. Sipas tij, fakti që ka një zë publik e bën edhe më të rëndësishme marrjen e një qëndrimi.
Aktori theksoi gjithashtu se, edhe pse kritikon reagimin e Izraelit pas sulmeve të 7 tetorit, ai i dënon pa mëdyshje sulmet e Hamasit, të cilat i cilësoi si krime të tmerrshme.
Ai pranoi se qëndrimi i tij mund të ketë ndikuar në disa mundësi profesionale, duke përmendur raste kur projekte apo fushata nuk janë realizuar për shkak të pozicionit të tij publik. Megjithatë, Bardem tha se nuk e shqetëson kjo gjë, duke shtuar se nuk varet vetëm nga industria amerikane e filmit dhe se vazhdon të ketë hapësira të tjera pune, përfshirë edhe në Spanjë.
Aktori pranoi se ndjen njëkohësisht mbështetje dhe presion, duke mos përjashtuar mundësinë e “listimit të heshtur” në disa raste, por theksoi se nuk ka prova konkrete për këtë.
