Aktorët kryesorë të vazhdimit të shumëpritur të The Devil Wears Prada 2 kanë arritur një marrëveshje financiare që po komentohet gjerësisht në industrinë e filmit. Sipas raportimeve ndërkombëtare, Meryl Streep, Anne Hathaway dhe Emily Blunt do të paguhen në mënyrë të barabartë për rikthimin në rolet ikonike të filmit.
Të treja aktoret, që rikthehen si Miranda Priestly, Andrea Sachs dhe Emily Charlton, thuhet se kanë negociuar një pagë bazë prej 12.5 milionë dollarësh secila. Marrëveshja është realizuar përmes një kontrate të tipit “favored nations”, e cila garanton që asnjëra prej tyre të mos marrë më pak se tjetra.
Përveç pagesës fikse, yjet e filmit pritet të përfitojnë edhe bonuse të lidhura me performancën në kinema. Raportimet sugjerojnë se fitimet totale për secilën aktore mund të kalojnë shifrën e 20 milionë dollarëve.
Regjisori David Frankel ka lënë të kuptohet se një pjesë e konsiderueshme e buxhetit të filmit është investuar pikërisht te kastingu kryesor, duke treguar rëndësinë që studioja i ka dhënë rikthimit të emrave origjinalë.
Filmi i parë, i publikuar në vitin 2006, pati një sukses të madh global, duke arkëtuar mbi 300 milionë dollarë në mbarë botën. Ndërkohë, vazhdimi raportohet të ketë një buxhet shumë më të lartë, me pritshmëri të mëdha për sukses në arkëtimet ndërkombëtare.
