Teuta rikthehet në “play out” pas 18 vitesh/ Hodo, gati një tjetër “gol” vendimtar

Teuta do të luajë një nga ndeshjet më të rëndësishme të viteve të fundit, teksa rikthehet në një duel “play-out” pas plot 18 vitesh. Një sfi dë që do të përcaktojë fatin e sezonit për “Djemtë e Detit”, të cilët synojnë me çdo kusht qëndrimin në elitën e futbollit shqiptar. Hera e fundit që skuadra durrsake zhvillonte një përballje të tillë daton më 24 maj të vitit 2008, në stadiumin “Qemal Stafa”, sot “Air Albania”, përballë Burrelit. Ajo ndeshje mbetet ende e freskët në kujtesën e tifozëve blu, pasi Teuta triumfoi me rezultatin 2-1 dhe siguroi mbijetesën mes më të mirëve.

Golin vendimtar në atë takim e realizoi Bledar Hodo, i cili sot mban rolin e trajnerit të skuadrës durrsake, duke i dhënë kështu kësaj sfi de një simbolikë edhe më të veçantë. Në kampin durrsak atmosfera është e qartë: motivimi është në maksimum dhe objektivi i vetëm mbetet fi torja. Pavarësisht kundërshtarit që do të kenë përballë, te Teuta ekziston bindja se ky sezon duhet shpëtuar me çdo kusht. Pas një kampionati me shumë ulje-ngritje dhe vështirësi, skuadra kërkon të reagojë pikërisht në momentin më vendimtar.

Një nga armët më të forta të Teutës pritet të jetë faktori fushë. Stadiumi “Niko Dovana” është kthyer në një fortesë të rëndësishme për skuadrën durrsake, ku shumë kundërshtarë kanë hasur vështirësi gjatë sezonit. Tifozëria blu pritet të jetë në numër të madh dhe të luajë një rol kyç, duke mbështetur ekipin nga minuta e parë deri në fund. Përveç mbështetjes së tifozëve, Teuta mbështetet edhe te eksperienca e grupit.

Në përbërje ka futbollistë me cilësi dhe eksperiencë, lojtarë që dinë të menaxhojnë presionin e sfi dave të tilla dhe që kanë kaluar më parë momente të rëndësishme në karrierë. Pikërisht kjo eksperiencë shihet si një element kyç për të përballuar tensionin dhe përgjegjësinë që sjell një ndeshje “play-out”. Tashmë gjithçka do të vendoset në 90 minuta, ku Teuta do të kërkojë të shkruajë një tjetër histori shpëtimi, ashtu si 18 vite më parë. Në Durrës besojnë se skuadra ka forcën, karakterin dhe mbështetjen e duhur për të mbetur pjesë e Superiores edhe sezonin e ardhshëm.

© BalkanWeb