Albumi ikonik “1989” i Taylor Swift dhe superhiti “Single Ladies (Put a Ring on It)” i Beyoncé janë përzgjedhur ndër 25 incizimet që do të ruhen në Regjistrin Kombëtar të Regjistrimeve të Library of Congress për vitin 2026.
Institucioni i ka cilësuar përzgjedhjet e këtij viti si “thesare audio të denja për t’u ruajtur përgjithmonë”, duke theksuar rëndësinë e tyre kulturore, historike dhe estetike për trashëgiminë muzikore amerikane.
Përveç Swift dhe Beyoncé, lista përfshin edhe vepra të njohura si “Feliz Navidad” nga José Feliciano, “Rumor Has It” nga Reba McEntire, “Go Rest High on That Mountain” nga Vince Gill, “I Feel for You” nga Chaka Khan, si dhe albumin “The Blue Album” nga Weezer.
Lista e këtij viti nuk kufizohet vetëm në muzikë, por përfshin edhe momente historike, si transmetimi radiofonik i përballjes legjendare të vitit 1971 mes Muhammad Ali dhe Joe Frazier.
Viti 2026 shënon një moment të rëndësishëm, pasi është hera e parë që vepra të Taylor Swift dhe Beyoncé përfshihen në këtë arkiv prestigjioz. Një tjetër detaj unik është përfshirja në të njëjtën listë e një prindi dhe fëmijës së tij: Rosanne Cash dhe babai i saj, Johnny Cash, i cili ishte përfshirë më herët me regjistrimin e tij të famshëm në burgun e Folsom.
Artistët e përfshirë kanë reaguar me emocion. Vince Gill e cilësoi këngën e tij si më të rëndësishmen e karrierës, pasi u shkrua në kujtim të vëllait të tij, ndërsa Chaka Khan e quajti “I Feel for You” një vepër historike, duke nderuar bashkëpunimet me emra si Prince, Stevie Wonder dhe Grandmaster Melle Mel.
Me shtesat e këtij viti, Regjistri Kombëtar i Regjistrimeve numëron tashmë 700 incizime. Drejtori i përkohshëm i institucionit, Robert R. Newlen, u shpreh se muzika dhe tingulli i regjistruar janë pjesë thelbësore e jetës dhe trashëgimisë kombëtare, duke theksuar rëndësinë e ruajtjes së tyre për brezat e ardhshëm.
E themeluar në vitin 1800 në Uashington, D.C., Biblioteka e Kongresit mbetet biblioteka më e madhe në botë, me mbi 162 milionë materiale që përfshijnë libra, dorëshkrime, fotografi dhe arkiva historike.
