Reperi i njohur botëror Ye nuk do të performojë në Indi këtë muaj, pasi koncerti i tij i planifikuar në Nju Delhi është anuluar zyrtarisht nga organizatorët.
Eventi, i cili ishte parashikuar të mbahej më 23 maj 2026 në stadiumin Jawaharlal Nehru, ishte pjesë e turneut të parë të artistit në Indi dhe konsiderohej një nga koncertet më të mëdha të planifikuara në vend. Fillimisht i shtyrë nga data 29 mars, shfaqja ishte pritur me interes të madh nga fansat.
Sipas një deklarate të publikuar në Instagram nga organizatorët, vendimi për anulim erdhi pas “direktivave të dhëna nga autoritetet”, pa dhënë detaje të mëtejshme mbi arsyet specifike të këtij vendimi.
“Jemi thellësisht të zhgënjyer të njoftojmë se ‘Ye Live in India’, i planifikuar për 23 maj 2026 në Nju Delhi, nuk do të zhvillohet për shkak të udhëzimeve nga autoritetet,” thuhej në deklaratë.
Organizatorët theksuan gjithashtu se siguria e pjesëmarrësve dhe qytetarëve mbetet prioriteti kryesor, duke shtuar se situata aktuale e bënte të pamundur zhvillimin e eventit.
Në njoftim u konfirmua gjithashtu se të gjitha biletat e blera përmes platformës zyrtare do të rimbursohen brenda 5–7 ditëve pune.
Ndërkohë, ekipet e artistit dhe organizatorët po shqyrtojnë mundësinë e caktimit të një date të re, por ende nuk ka një orar apo vend të konfirmuar për një koncert të ardhshëm në Indi.
