Aktorja e njohur amerikane Brooke Shields ka rrëfyer së fundmi vështirësitë dhe presionin me të cilin u përball që në fëmijëri, ndërsa u rrit nën vëmendjen e vazhdueshme të kamerave dhe industrisë së argëtimit.
Shields u shfaq për herë të parë në ekran që në moshë foshnjore, por fama e saj mori përmasa të mëdha gjatë fëmijërisë, kur interpretoi role që shkaktuan diskutime të shumta publike. Një nga projektet më të komentuara mbetet Pretty Baby, filmi ku ajo luajti vetëm 11 vjeçe dhe që më pas u konsiderua kontrovers për temat dhe skenat e trajtuara.
Aktorja ka pranuar se ky rol ndikoi për vite të tëra në mënyrën se si perceptohej nga publiku dhe industria, duke u etiketuar si “seks-simbol”, një imazh nga i cili e kishte të vështirë të largohej.
Sot, në moshën 60-vjeçare, dhe e njohur gjithashtu për filmin The Blue Lagoon, Shields thotë se projektet e hershme përcaktuan drejtimin e karrierës së saj dhe krijuan pritshmëri që nuk përputheshin gjithmonë me dëshirat apo identitetin e saj artistik.
Si një moment kthese në karrierë, ajo përmendi pjesëmarrjen në serialin Friends në vitin 1996, ku interpretoi një personazh komik. Sipas saj, pikërisht aty kuptoi se ndihej më e lirë dhe më natyrale në role humori, sesa në ato ku trajtohej si objekt.
Në dokumentarin Pretty Baby: Brooke Shields, aktorja rikujton me emocion vendime të marra gjatë fëmijërisë dhe pranon se sot, si nënë, nuk do të pranonte që vajzat e saj të kalonin të njëjtat eksperienca.
