Një çështje e pazakontë në Itali ka përfunduar në Gjykatën e Lartë, pas një procesi gjyqësor të nisur nga një turiste ndaj një hoteli luksoz me pesë yje, për shkak të shërbimit të ujit të ambalazhuar.
Ngjarja daton në vitin 2019, kur turistja kërkoi në mënyrë të përsëritur që gjatë vakteve t’i shërbehej ujë çezme. Ajo pretendoi se ishte e gatshme të paguante për shërbimin, por hoteli vijoi t’i ofronte vetëm ujë të ambalazhuar, me shishe 0.75 litra me një kosto rreth 7 euro secila.
Pas ankesës së saj, gruaja e çoi çështjen në gjykatë duke kërkuar rreth 2,700 euro dëmshpërblim, duke argumentuar se uji i pijshëm duhet të konsiderohet e drejtë themelore dhe të ofrohet pa pagesë.
Megjithatë, Gjykata e Lartë e Italisë vendosi në favor të hotelit, duke rrëzuar pretendimet e saj. Sipas vendimit, nuk ekziston një detyrim ligjor për hotelet apo restorantet që t’u shërbejnë klientëve ujë çezme gjatë vakteve.
Gjykata theksoi gjithashtu se klientët janë të lirë të zgjedhin të mos konsumojnë ujë të ambalazhuar ose të sjellin ujë të tyre, nëse e konsiderojnë të nevojshme. Rasti ka ndezur debat në opinionin publik italian mbi të drejtat e konsumatorëve, praktikat e industrisë së mikpritjes dhe përdorimin e burimeve natyrore, veçanërisht në një kohë kur çështjet mjedisore po marrin gjithnjë e më shumë vëmendje.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
