Kosova u mund nga Çekia, Zabërgja dhe Demaku shohin anën pozitive të humbjes

Pavarësisht humbjes 2-1 ndaj Çekisë në miqësoren e zhvilluar në Pragë, futbollistët e Kosovës kanë vlerësuar paraqitjen e skuadrës, sidomos reagimin në pjesën e dytë. Sulmuesi Baton Zabërgja dhe mesfushori Vesel Demaku theksuan se “Dardanët” treguan karakter ndaj një kundërshtari që do të marrë pjesë në Kupën e Botës dhe se me pak më shumë fat mund të kishin dalë me një rezultat pozitiv.

Zabërgja: Goli i hershëm ndryshoi ndeshjen
Sulmuesi Baton Zabërgja mendon se momenti vendimtar i takimit ishte goli i parë i pësuar në minutën e 12-të. Sipas tij, deri në atë moment skuadrat ishin të balancuara, ndërsa avantazhi i hershëm i çekëve ndikoi në rrjedhën e lojës. “Si skuadra kemi qenë të dyja të barabarta, por ndikoi goli i pësuar herët. Ai gol ndryshoi rrjedhën e lojës, sepse në përgjithësi mendoj se ishim të barabartë”, deklaroi Zabërgja. Sulmuesi i Metalist 1925 të Ukrainës vlerësoi reagimin e Kosovës pas pushimit, duke nënvizuar se skuadra krijoi raste të mira për shënim dhe ishte pranë barazimit. “Ne nuk i shfrytëzuam rastet tona dhe futbolli është i tillë. Megjithatë, edhe pas rezultatit 2-0, në pjesën e dytë dominuam më shumë kundërshtarin dhe me pak fat ndeshja mund të përfundonte edhe në barazim”, shtoi ai. Për Zabërgjën, kjo ishte paraqitja e pestë me fanellën e Kosovës.

Demaku: Test i vlefshëm për të ardhmen
Paraqitje pozitive shfaqi edhe mesfushori Vesel Demaku. Futbollisti i Altahut në Austri e konsideroi sfi dën një provë të rëndësishme për Kosovën, përballë një skuadre që do të jetë pjesë e Botërorit. “Ishte ndeshje miqësore, por ne e morëm shumë seriozisht. Ishte një test i mirë kundër një kombëtareje që do të paraqitet në Kupën e Botës. Mendoj se në përgjithësi ishte një ndeshje e mirë”, tha Demaku. Mesfushori u aktivizua në minutën e 62-të në vend të Veldin Hoxhës dhe solli më shumë energji në repartin e mesfushës. Ai beson se Kosova meritonte më shumë nga kjo sfi dë. “Edhe pse pranuam gol herët, ekipi u mundua të rikthehej në lojë dhe arritëm të shënonim. Mendoj se po të kishim edhe disa minuta shtesë, mund të realizonim një tjetër gol. Lindoni dhe Valmiri dhanë kontribut të madh pas inkuadrimit në fushë, ndërsa Lindoni e kurorëzoi paraqitjen me gol”, u shpreh Demaku. Për 26-vjeçarin, kjo ishte paraqitja e katërt me fanellën e Kosovës dhe një rikthim i rëndësishëm në përfaqësuese pas një periudhe të gjatë mungese.

© BalkanWeb