Vllaznia nuk po mendon vetëm për suksesin e menjëhershëm, por edhe për të ardhmen. Kjo është reflektuar qartë gjatë fazës përgatitore në Slloveni, ku një numër i konsiderueshëm futbollistësh të rinj i janë bashkuar ekipit të parë.
Klubi shkodran vijon t’i kushtojë rëndësi akademisë, duke u dhënë talenteve mundësinë të stërviten dhe të rriten pranë futbollistëve më me eksperiencë. Për trajnerin Edi Martini dhe stafin e tij teknik, kjo periudhë është një mundësi ideale për të vlerësuar nga afër potencialin e secilit prej tyre. Përveç rezultateve të ndeshjeve miqësore, fokusi është edhe te mënyra se si të rinjtë përshtaten me ritmin e ekipit të parë, reagojnë në stërvitje dhe përballojnë kërkesat e futbollit profesionist.
Ata që do të arrijnë të bindin stafin teknik me paraqitjet e tyre, pritet të kenë mundësinë të fitojnë minuta edhe gjatë sezonit. Vllaznia ka treguar edhe në vitet e fundit se nuk heziton t’u besojë futbollistëve të dalë nga akademia, nëse ata e meritojnë me punën dhe nivelin e shfaqur në fushë. Nga ana tjetër, drejtuesit janë të vetëdijshëm se jo të gjithë të rinjtë mund të gjejnë hapësirat e nevojshme në skuadrën e parë.
Pikërisht për këtë arsye, në plan mbeten edhe huazimet e disa prej tyre te skuadra të tjera, me qëllim që të sigurojnë minutazhin e duhur dhe të vazhdojnë procesin e zhvillimit në kushte konkurruese. Në fund, objektivi i Vllaznisë është i qartë: të ndërtojë një urë të fortë mes akademisë dhe ekipit të parë. Faza përgatitore në Slloveni është vetëm hapi i parë i këtij procesi, ndërsa muajt në vazhdim do të tregojnë se cilët prej talenteve të rinj do të arrijnë të fitojnë një vend të rëndësishëm në projektin kuqeblu.
