Ferrari nuk po e ngadalëson ritmin në zhvillimin e makinës SF26. Që nga ndërprerja e kampionatit në prill, e shkaktuar nga anulimi i Çmimeve të Mëdha të Bahrejnit dhe Arabisë Saudite, skuadra italiane e ka kthyer në rutinë prezantimin e paketave të reja teknike pothuajse në çdo fundjavë gare, në përpjekje për të ngushtuar diferencën me rivalët kryesorë.
Megjithatë, Formula 1 e sotme nuk lejon më investime të pakufizuara si në të kaluarën. Me kufirin buxhetor në fuqi, çdo përmirësim duhet planifikuar me kujdes, pasi zhvillimi i makinës përfshihet në shpenzimet e rregulluara. Kanë mbetur pas kohët kur skuadrat më të mëdha mund të mbanin në funksion disa tunele ere njëkohësisht dhe të zhvillonin teste private pa kufizime për të përshpejtuar evolucionin e makinave të tyre.
REAGIMI I ASHPËR I TOTO VOLF – Shefi i Mercedesit ka ngritur zërin për numrin e madh të përmirësimeve që po prezanton Ferrari. “Jemi disi të habitur që Ferrari arrin të sjellë kaq shumë përditësime të mëdha në makinë”, deklaroi Volf, duke lëshuar një mesazh të qartë edhe ndaj FIA-s. “Sipas mendimit tim, shumë shpejt duhet t’u mbarojnë fondet e lejuara nga kufiri i kostove, sepse ne nuk mund ta bëjmë këtë. Thjesht nuk kemi hapësirë brenda tavanit buxhetor për të sjellë kaq shumë pjesë të reja në mënyrën si po veprojnë ata”, tha drejtuesi i Mercedesit. Volf la të kuptohet se Ferrari mund ta ketë të vështirë të vazhdojë zhvillimin e makinës deri në fund të sezonit, për shkak të kufizimeve financiare të vendosura nga FIA.
METAMORFOZA E SF-26 DHE RIVALËT – Ndërsa Red Bulli ka sjellë disa ndryshime të rëndësishme në makinë dhe Mercedesi zgjodhi një paketë të vetme të madhe përmirësimesh në Montreal, Ferrari ka transformuar ndjeshëm njëvendëshen SF-26. Përveç evolucionit të madh aerodinamik të prezantuar në Majami dhe Barcelonë, skuadra italiane ka shtuar vazhdimisht modifikime në pllakat anësore të krahëve, në gjeometrinë e dyshemesë së makinës, si dhe ka prezantuar të ashtuquajturin ‘krahu Makarena”, një zgjidhje inovative ku elementi i sipërm rrotullohet 180 gradë kur aktivizohet modaliteti ‘Straight Mode”.
DEBATI PËR MOTORIN – Pika më e debatueshme lidhet me njësinë e fuqisë. Pas përfundimit të klasifikimit të parë të sistemit ADUO nga FIA, pas Çmimit të Madh të Monakos, prodhuesve të motorëve që rezultuan nën nivelin referues të performancës iu lejua të shpenzonin më shumë, të përfitonin më shumë orë testimi dhe të zhvillonin komponentë që më parë ishin të ngrirë nga rregullorja. Si Audi ashtu edhe Ferrari reaguan menjëherë duke prezantuar versione të përditësuara të motorit në Austri, një lëvizje që Volf e sheh me skepticizëm. “Të vetmit që nuk po frenojnë janë të Ferrarit. Duket sikur nuk kanë asnjë kufi në këtë drejtim. Për më tepër, ata prisnin vendimin për ADUO-n dhe më pas erdhën me një motor të ri. Kjo do të thotë se zhvillimin duhet ta kenë nisur të paktën gjashtë muaj më parë”, përfundoi Toto Volf. Tashmë vëmendja kalon te FIA, e cila pritet të monitorojë me kujdes nëse ritmi intensiv i zhvillimit të Ferrarit në Maranelo është plotësisht në përputhje me kufizimet e rrepta financiare që zbatohen në Formula 1.
