Alexander Zverev vazhdon të konfirmojë formën e shkëlqyer edhe në Wimbledon. Numri 3 i botës dhe fituesi i fundit i Roland Garros siguroi një vend në raundin e katërt, pasi mposhti amerikanin Marcos Giron me rezultatin 6-2, 7-6, 6-4.
Gjermani dominoi setin e parë, hasi më shumë vështirësi në vazhdim, veçanërisht në setin e tretë ku bëri disa gabime të pazakonta, por në fund arriti të mbyllte ndeshjen në tri sete. Kundërshtari i tij i radhës do të jetë çeku Jiri Lehecka, që eliminoi Jaume Munar me rezultatin 6-4, 6-4, 4-6, 6-4.
Në raundin e katërt avancoi edhe australiani Alex de Minaur, fitues ndaj Zachary Svajda me shifrat 6-2, 5-7, 6-2, 6-4. Tashmë ai do të përballet me italianin Flavio Cobolli. Spektakël dhuroi edhe britaniku Arthur Fery, i cili fitoi pas pesë seteve ndaj Zizou Bergs, ndërsa Alexander Bublik siguroi kualifikimin pas suksesit të luftuar ndaj Frances Tiafoe.
Në konkurrimin e femrave, vëmendja u përqendrua te eliminimi surprizë i kampiones në fuqi, Iga Swiatek. Polakja u mposht në dy sete nga filipinasja Alexandra Eala, me rezultatin 7-6, 6-2, duke i dhënë fund mbrojtjes së titullit në Wimbledon.
Eala, e rritur në Akademinë e Rafael Nadalit, do të përballet në raundin e ardhshëm me italianen Jasmine Paolini, në një sfidë që pritet me shumë interes.
Ndërkohë, vijuan rrugëtimin edhe Marta Kostyuk, Marie Bouzkova, Ashlyn Krueger dhe Linda Noskova, ndërsa turneu humbi edhe një tjetër pretendente për titull. Elena Rybakina, numri 2 i botës, u eliminua nga Elise Mertens me rezultatin 7-6, 6-1.
Jashtë garës mbeti edhe finalistja e edicionit të kaluar, Amanda Anisimova, e cila u mposht në derbin amerikan nga Madison Keys. Wimbledoni vazhdon kështu të dhurojë emocione dhe surpriza, me shumë prej favoriteve që i kanë dhënë fund rrugëtimit më herët sesa pritej.
