Bajerni i Mynihut e ka nisur me humbje fazën përgatitore për sezonin e ri. Kampionët e Gjermanisë dhe fituesit e Kupës u mposhtën 2-1 në transfertë nga Wehen Wiesbaden, skuadër që militon në kategorinë e tretë, në një sfidë të organizuar edhe në kuadër të 100-vjetorit të klubit vendas.
Skuadra e drejtuar nga Vincent Kompany u paraqit me një formacion të përbërë kryesisht nga futbollistë të rinj, ndërsa munguan shumë prej yjeve që kanë qenë të angazhuar në Kupën e Botës dhe ende nuk janë bashkuar me ekipin.
Wehen Wiesbaden kaloi dy herë në avantazh me golat e Ibrahim Ati Allah dhe Lukas Schleimer, ndërsa për Bajernin shënoi Tom Bischof nga pika e penalltisë, gol që rezultoi i pamjaftueshëm për të shmangur humbjen.
Në fushë u panë edhe Sacha Boey dhe João Palhinha, të rikthyer nga huazimet, por që sipas mediave gjermane pritet të largohen gjatë merkatos së verës.
Ndërkohë, Harry Kane, Michael Olise dhe Joshua Kimmich do t’i bashkohen skuadrës në ditët në vijim, ndërsa Bajerni do të zhvillojë një grumbullim në Bavari përpara turneut veror në Azi. Testi i parë zyrtar i sezonit për bavarezët do të jetë më 22 gusht, kur do të përballen me Borussia Dortmundin në Superkupën e Gjermanisë.
