AF Elbasani është mposhtur me rezultatin 3-1 nga Partizani në ndeshjen miqësore të zhvilluar në stadiumin “Elbasan Arena”, në një test me intensitet të lartë që shërbeu si një provë e rëndësishme për të dy skuadrat në prag të sezonit të ri futbollistik.
Pavarësisht humbjes, skuadra e drejtuar nga Ivan Gvozdenoviç zhvilloi një paraqitje pozitive në shumë momente të takimit, duke krijuar raste të shumta për shënim dhe duke treguar ritëm të mirë loje. Megjithatë, mungesa e saktësisë në finalizim dhe disa pasiguri në repartin defensiv u shfrytëzuan në maksimum nga Partizani, i cili u tregua më cinik dhe më efikas përpara portës.
Për skuadrën kryeqytetase realizuan Keko, Sidibe nga pika e bardhë e penalltisë dhe Doumbia, ndërsa goli i vetëm për AF Elbasanin u shënua nga Ardit Nikaj.
Partizani kalon në avantazh në pjesën e parë
Minutat e para të sfidës u karakterizuan nga një lojë e kujdesshme nga të dy ekipet, të cilat u përpoqën të kontrollonin topin dhe të gjenin ritmin e duhur. Me kalimin e minutave, AF Elbasani mori më shumë iniciativën në ndërtimin e aksioneve, por ishte Partizani ai që goditi i pari.
Në minutën e 13-të, pas një kundërsulmi të shpejtë të ndërtuar nga e majta me Hjumën dhe të vazhduar nga Skuka, topi përfundoi te Keko, i cili nuk gaboi përballë portës, duke kaluar të kuqtë në avantazh 0-1.
Pas golit të pësuar, verdheblutë reaguan menjëherë. Tresa provoi me një goditje dënimi, ndërsa Nikaj dhe Diallo tentuan nga distanca, por pa sukses. Nga ana tjetër, Partizani vazhdoi të ishte i rrezikshëm në kundërsulm, me Skukën dhe Kekon që iu afruan golit të dytë, por portieri Aleksovski reagoi në momentin e duhur.
Në fundin e pjesës së parë, Elbasani ishte shumë pranë barazimit. Një goditje e fuqishme e Ardit Nikajt u devijua nga portieri Qirko dhe përfundoi në traversë, ndërsa pak çaste më vonë gardiani i Partizanit ndali edhe një tentativë të Lulajt me një pritje spektakolare.
45 minutat e para u mbyllën me rezultatin 0-1 në favor të Partizanit.
Penalltia e Sidibes dhe reagimi i menjëhershëm i Nikajt
Pjesa e dytë nisi me ritëm edhe më të lartë. Vetëm gjashtë minuta pas rifillimit të lojës, arbitri akordoi penallti për Partizanin pas një ndërhyrjeje ndaj Skukës. Nga pika e bardhë, Sidibe u tregua i saktë dhe dyfishoi avantazhin e të kuqve në 0-2.
Megjithatë, reagimi i AF Elbasanit ishte i menjëhershëm. Vetëm dy minuta më vonë, Ardit Nikaj provoi me një goditje drejt portës dhe pas një devijimi topi përfundoi në rrjetë, duke ngushtuar shifrat në 1-2 dhe rikthyer shpresat për vendasit.
Verdheblutë shtuan presionin në kërkim të golit të barazimit, duke ushtruar kontroll mbi lojën për disa minuta.
Doumbia vulos fitoren e Partizanit
Në momentin më të mirë të AF Elbasanit, Partizani goditi sërish. Në minutën e 62-të, Doumbia përfitoi nga një kthim i topit pas ndërhyrjes së Aleksovskit dhe me një goditje të saktë dërgoi topin në rrjetë për rezultatin 1-3.
Në vazhdim, të dy trajnerët aktivizuan shumë lojtarë nga stoli, duke i dhënë mundësi gjithë grupit. Edhe pse Elbasani vazhdoi të sulmonte dhe krijoi disa raste të mira, finalizimi mbeti pika më e dobët. Hebaj pati mundësinë më të mirë me një goditje me kokë, por portieri Qirko u tregua edhe një herë vendimtar, duke ruajtur avantazhin e skuadrës së tij.
Deri në vërshëllimën përfundimtare rezultati nuk ndryshoi dhe Partizani u largua nga “Elbasan Arena” me një fitore 3-1.
Për AF Elbasanin, edhe pse rezultati nuk ishte ai i dëshiruar, kjo miqësore ofroi sinjale pozitive për ritmin e lojës dhe krijimin e rasteve, por njëkohësisht evidentoi nevojën për më shumë përqendrim në mbrojtje dhe efikasitet në finalizim, përpara nisjes së sezonit zyrtar.
