Kombëtarja shqiptare U-21 po hyn në fazën përfundimtare të përgatitjeve për një tjetër aventurë të rëndësishme ndërkombëtare. Trajneri Alban Bushi ka bërë publike listën e futbollistëve të grumbulluar për pjesëmarrjen në Lojërat Mesdhetare “Taranto 2026”, që do të zhvillohen në Itali.
Në listën e teknikut kuqezi bëjnë pjesë futbollistë që aktivizohen në kampionatin shqiptar, por edhe talente që e zhvillojnë eksperiencën e tyre jashtë vendit, duke i dhënë grupit një kombinim të rëndësishëm mes eksperiencës së fituar në futbollin vendas dhe asaj ndërkombëtare.
Pjesa më e madhe e lojtarëve vijnë nga ekipe të Abissnet Superiores dhe Kategorisë së Parë, ndërsa në grup janë edhe futbollistë të angazhuar në akademi dhe ekipe të kampionateve europiane, përfshirë Holandën, Greqinë dhe Italinë.
Në repartin e portës janë grumbulluar Skander Tahri dhe Amarildo Dervishaj, ndërsa mbrojtja përfaqësohet nga Arlind Leshi, Antonis Dama, Aurel Marku, Rajmond Marinaj, Kevi Mejdani, Renato Halili dhe Valentin Daja.
Në mesfushë bëjnë pjesë Ersi Bode, Bjorni Duka, Oresti Kasmollari, Orgito Ruçi dhe Jordi Jaku, ndërsa alternativat në krahët e sulmit janë Hetem Lushaj, Kristi Bespallov, Emiljano Mihana dhe Nebi Qokthi.
Kjo listë përfaqëson një tjetër mundësi për futbollistët e rinj shqiptarë për të fituar eksperiencë në një kompeticion ndërkombëtar me nivel të lartë, teksa Shqipëria do të përballet me Italinë, Kosovën dhe Algjerinë në Grupin B.
Kuqezinjtë do ta nisin aventurën më 22 gusht, me sfidën ndaj Italisë në Leçe, për të vijuar më pas me Kosovën dhe Algjerinë.
Pjesëmarrja në “Taranto 2026” i jep Kombëtares U-21 një tjetër platformë të rëndësishme për zhvillimin e talenteve dhe përfaqësimin e Shqipërisë në një event të rëndësishëm multisportiv të rajonit të Mesdheut.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
