Telushi dhe Mala janë dy përforcimet zyrtare të Partizanit deri tani. Edhe për sulmuesin Lukas Kardozo thuhet se është i kuq, por mungon prezantimi. Zyrtarizimi i radhës tek ekipi i drejtuar nga trajneri Sulejman Starova pritet të jetë pogradecari Vangjel Zguro.
Zguro, i cili së fundi është aktivizuar me Luftëtarin, luan si mbrojtës i majtë. Për këtë rol të kuqtë kanë në kontigjent edhe Kalarin dhe Kotobellin. Ky i fundit erdhi në merkaton e verës dhe gjatë gjysmës së parë të sezonit nuk ka dhënë atë që pritej. Ajo që i bën të rimendohen drejtuesit e kuq është paga e lartë e këtij futbollisti, i cili është në merkato.
Për Kotobellin ka një interesim nga Vllaznia, por ende asgjë konkrete. Sidoqoftë, ardhja e Zguros do të thotë se njëri mes Kalarit dhe Kotobellit do të lërë Partizanin në merkaton e dimrit, sepse tre mbrojtës të majtë janë shumë në një ekip. Kotobelli mund të luajë edhe si mesfushor, por shanset e tij për të mbetur i kuq janë të pakta.
