Drejtuesi i Mercedesit, Toto Volf, analizon fundjavën në Monza dhe parashikon një Çmim të Madh të Italisë me shumë të panjohura. “Monza dhe Madridi shënojnë fillimin e një periudhe të rëndësishme për ne. Lufta është ngushtuar deri në atë pikë sa disa skuadra kanë mundësi të fitojnë, ndërsa kostoja e një gabimi është shumë më e lartë. Kemi arritur të pozicionohemi mirë në të dy kampionatet, por askush në ekipin tonë nuk ka iluzione për vështirësinë e garave që na presin”, shprehet fillimisht Volf.
Më tej austriaku ndalet të penalizimi i Kimi Antonelit, i cili do të startojë nga fundit për shkak të ndryshimit të motorit: “Për ne, Monza nis me një sfidë: Kimi do të marrë një penalizim për shkak të njësisë së fuqisë dhe do ta nisë garën nga fundi. Është zhgënjyese për të dhe për tifozët që duan ta shohin duke luftuar në krye në garën e tij të shtëpisë, por sporti ynë nuk lë shumë hapësirë për romantizëm.
Kur merr vendime duke pasur në fokus kampionatin, ndonjëherë duhet të paguash një çmim në afat të shkurtër. Objektivi tani është i thjeshtë: të rikuperojmë sa më shumë pozicione të jetë e mundur dhe të maksimizojmë pikët. Në anën tjetër të garazhit, Rasëll mbërrin në Itali me një moment pozitiv pas Holandës dhe do të përpiqet të futet fuqishëm në garë që në fillim të fundjavës. Monza është një pistë e vështirë sa i përket rikuperimit të energjisë.
Për pjesën më të madhe të xhiros i kërkon gjithçka njësisë së fuqisë dhe nuk ke shumë mundësi për të rikarikuar baterinë. Me rregulloret aktuale, kjo krijon disa kompromise që duhet të menaxhohen me shumë kujdes. Është një sfidë interesante dhe, me shumë gjasa, do të krijojë kushtet për një fundjavë emocionuese”, deklaron Volf.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
