Ëndrra e çdo tifozi që viziton Parkun e Monzës për Çmimin e Madh të Italisë është të jetë pjesë e asaj fotografie mitike që kurorëzon një nga të dielat më magjike të Formulës 1: momenti kur podiumi pasohet nga pushtimi tradicional i pistës nga tifozët italianë.
Dhe nëse skuadra që fiton është Ferrari, festa bëhet e jashtëzakonshme dhe prodhon imazhe të paharrueshme, siç ka ndodhur në vitet e lavdishme me Mikael Shumakerin, Fernando Alonsos apo Sharl Lëklerkun. Në vitin 2026, mundësia është reale. SF-26 është konkurruese dhe kushtet duket se favorizojnë ekipin nga Maranelo. Për më tepër, Ferrari do të rikthehet të luftojë për titullin botëror përballë një tjetër idhulli të madh vendas, Andrea Kimi Antoneli.
Për Ferrarin në Monza është thënë dhe shkruar shumë, siç është e natyrshme. Aq më tepër kur gara në shtëpi merr një simbolikë të veçantë. Në vitin 2026, skuadra do t’i kushtojë homazhe një prej pilotëve më të rëndësishëm të historisë moderne të saj, “Kaiser”-it Mikael Shumaker. Luis Hamilton dhe Sharl Lëklerk kanë një mundësi të mirë, për sa kohë që arrijnë të lënë pas zhgënjimin e garës së Holandës. Britaniku u largua nga Holanda duke shprehur hapur pakënaqësinë për konfuzionin me shokun e skuadrës dhe murin e bokseve, përpara se më vonë të kërkonte falje. “Nuk ishte versioni im më i mirë”, pranoi ai. Megjithatë, për Çmimin e Madh të shtëpisë, energjitë janë rinovuar.
Edhe nga pikëpamja teknike, pasi skuderia konfirmoi se njësia e saj e fuqisë do të mbërrijë e përditësuar dhe e përmirësuar. “Ne kemi sjellë një motor të përmirësuar, si pjesë e mundësive të zhvillimit të ADUO-së”, deklaroi drejtuesi i Ferrarit, Fred Vasër. Kjo i hap skuadrës mundësinë për të përfituar plotësisht nga ky hap përpara. “Është një hap në drejtimin e duhur, sepse e dimë që këtë vit përfitimet do të jenë margjinale”, shtoi francezi. Termi i përdorur nga Vasër lidhet me garën e zhvillimit që Formula 1 po zhvillon në pjesën e sipërme të renditjes. Disa, si drejtuesi i Mercedesit, Toto Volf, po e menaxhojnë këtë garë sipas mënyrës së tyre
“Nuk i kemi paratë”, pranoi Volf. Ferrari, ndërkohë, po sjell përmirësime dhe po përqendrohet te puna e përditshme në Formula 1. Për momentin, gjithçka kalon përmes garës së shtëpisë. “Monza është një pistë që kërkon shumë dhe grupi do të jetë shumë pranë njëri-tjetrit. Prioriteti është të ekzekutojmë në mënyrë perfekte çdo aspekt të fundjavës”, përfundoi Vasër. Objektivi i Ferrarit do të jetë fitorja e tretë e sezonit 2026, pas triumfeve të Hamiltonit në Barcelonë dhe Lëklerkut në Silverston.
Një sukses në Monza do t’i rikthente kuqezinjtë në luftën për titullin botëror, një betejë që aktualisht favorizon Mercedesin dhe Kimi Antonelin. Italia ka gjithmonë rëndësi të veçantë për Ferrarin. Dhe ndoshta një tjetër festë e kuqe në Monza mund të ndryshojë ekuilibrat në “klasën mbretërore” të automobilizmit, pikërisht në prag të tre muajve vendimtarë të sprintit final për titullin kampion.
BOTËRORI 2026
RENDITJA
PILOTI PIKËT
1 Kimi Antoneli 242
2 Xhorxh Rasëll 183
3 Luis Hamilton 183
4 Lando Norris 159
5 Sharl Lëklerk 155
6 Maks Vershtapen 112
7 Oskar Piastri 104
8 Izak Hadxhar 68
9 Liam Louson 49
10 Pier Gasli 44
11 Arvid Lindblad 23
12 Franko Kolapinto 19
13 Oliver Berman 18
14 Gabriel Bortoleto 10
15 Niko Hylkenberg 6
16 Karlos Sainz 6
17 Aleksandër Albon 5
18 Esteban Okon 3
19 Fernando Alonso 3
20 Juki Cunoda 0
21 Lens Stroll 0
22 Valteri Botas 0
23 Serxho Perez 0
KONSTRUKTORËT
SKUDERIA PIKËT
1 Mercedes 425
2 Ferrari 338
3 MekLaren 263
4 Red Bull 186
5 Racing Bulls 66
6 Alpine 63
7 Haas 21
8 Audi 16
9 Uilliams 11
10 Aston Martin 3
11 Kadillak 0
GARA NË MONZA
AXHENDA
E premte, 4 shtator
Provat e lira 1 12:30
Provat e lira 2 17:00
E shtunë, 5 shtator
Provat e lira 3 12:30
Kualifikueset 16:00
E diel, 6 shtator
Gara 15:00
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
