Kosova nuk po kalon aspak një moment të qetë. Sikur të mos mjaftonin trazirat politike të shkaktuara nga vendimi i Gjykatës Speciale të Hagës lidhur me 4 ish udhëheqësit e UÇK edhe në futboll ambjenti nuk është aspak i qetë.
Pas kapitenit Amir Rrahmani, tërhiqet nga Kosova edhe Florent Hadergjonaj. Vendimi i këtij të fundit është momental dhe jo përfundimtar. Lojtari, me një postim në rrjetet sociale, ka shpjeguar situatën dhe vendimin e marrë për shkak të përplasjeve me stafin teknik, të kryesuar nga trajneri Franco Foda. Hadergjonaj thekson mes të tjerash se ka mungesë respekti dhe besimi.
“Pas shumë mendimi, kam marrë vendimin që, për momentin, të mos jem më në dispozicion të Kombëtares së Kosovës nën drejtimin e stafit aktual teknik. Ta përfaqësoj Kosovën ka qenë dhe mbetet një nga nderet më të mëdha të karrierës sime. Jam krenar për çdo paraqitje dhe për gjithçka që kam dhënë për këtë fanellë.
Me kalimin e kohës është bërë e qartë për mua se me trajnerin aktual nuk ekziston më baza e nevojshme e respektit dhe ndërsjellë e besimit për të vazhduar një bashkëpunim profesional. Për këtë arsye, kam arritur në një pike, ku duhet të vendos një kufi. Nuk është tërheqje nga Kombëtarja dhe nuk është vendim kundër Kosovës. Vendimi im lidhet vetëm me situatën aktuale dhe raportin tim me stafin teknik”, – shkruan Hadergjonaj.
Trajneri Foda pritet që të shpallë listën e lojtarëve të grumbulluar për ndeshjet e shtatorit dhe tetorit. “Dardanët” do të luajnë 4 ndeshje në Nations League, duke nisur ndaj Irlandës, ndaj Izraelit dhe më 4 tetor sërish ndaj Austrisë në Prishtinë. Situata nuk duket aq e qetë te Kosova, ndërsa për mometin nuk pritet të ketë futbollistë të tjerë që do të refuzojnë ftesën e teknikut Foda, ndryshe nga sa është përfolur në ditët e fundit.
