Në Itali, emri i Cristian Shpendit, po bën shumë zhurmë, kjo për shkak të numrave dhe ecurisë së tij fantastike në këtë fillim sezoni. Në 5 ndeshje, C.Shpendi ka shënuar 6 gola, askush nuk ka bërë më mirë se sa “bomberi” kuqezi, jo vetëm në Serie B, por në të gjithë Italinë. Jo vetëm kaq, mediat kanë shkuar edhe më tej duke zbuluar një tjetër detaj shumë domethënës.
Në këto 5 javë, Shpendi ka luajtur 424 minuta nga 450 në total, thuajse të gjithë ndeshjet e plota, por ajo që bën më shumë përshtypje, është fakti se Shpendi ka pasur 11 tentativa për gol, shumë pak për një sulmues, por saktësia e tij është mbresëlënëse. Nga 11 tentativa, 8 prej tyre kanë qenë në kuadrat, por në 6 raste i ka konvertuar në gol. E përkthyer në shifra, Shpendi ka qenë efikas në 75% të rasteve, duke pasur një saktësi thuajse kirurgjikale.
Sigurisht, bëhet fjalë për Serie B, nuk është niveli maksimal, por saktësia dhe rendimenti i tij është i jashtëzakonshëm, aq sa ka bërë që drejtuesit e Cesena-s të mendojnë që tani se çfarë do të ndodhë në janar, gjatë merkatos së dimrit.
Pikërisht për këtë pjesë është pyetur edhe Drejtori Sportiv i Cesena-s, Andrea Mancini: “Si një sulmues tipik, ai ka një instinkt prej killeri. Sulmues të tillë janë gjithnjë e më të rrallë në qarkullim. Jam shumë i lumtur për të, ai është jo vetëm një sulmues i veçantë, i fortë, por është edhe një djalosh i artë. Nuk do të jetë e lehtë ta mbajmë në skuadër në janar. E rëndësishme është që atëherë të arrijmë në kushte sa më të mira, më pas do të shohim se çfarë do të ndodhë”, u shpreh Drejtori Sportiv i Cesena-s i pyetur në lidhje me të ardhmen e C.Shpendit.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
