Në vitin 2026 ende nuk është zhvilluar asnjë garë e Formulës 1 në shi, por parashikimet për këtë fundjavë në Sepang e bëjnë një skenar të tillë shumë të mundshëm.
Nxehtësia, lagështira dhe rrebeshet tipike të Malajzisë mund ta kthejnë Çmimin e Madh në një provë të vërtetë për pilotët. Në kushte të lagështa ndryshojnë frenimet, trajektoret, pikat e referimit dhe mënyra e përdorimit të gazit. Pikërisht këtu talenti dhe përvoja mund të bëjnë diferencën.
VERSHTAPEN, MJESHTËR I SHIUT
Maks Vershtapen është ndër emrat e parë që vijnë në mendje. Holandezi ka dhënë disa nga paraqitjet më të forta të karrierës në pista të lagura. Në Interlagos, në vitin 2016, ai realizoi një nga përmbysjet më spektakolare të karrierës, duke u ngjitur nga vendi i 16- të në të tretin. Në vitin 2024, po në Brazil, u nis i 17-ti dhe fitoi nën shi, në një garë që pati peshë të madhe në luftën për titullin. Edhe Sepangu ka kujtime të veçanta për Vershtapenin. Në vitin 2017 ai fitoi këtu, ndërsa në provat në të lagësht kishte treguar më parë ritmin.
HAMILTON, NJË TJETËR SPECIALIST
Luis Hamilton është një tjetër emër i madh në kushte shiu. Fitorja në Silverston në vitin 2008, me më shumë se një minutë avantazh, mbetet një nga shembujt më të njohur. Në Brazil 2016 fitoi në kushte shumë të vështira, ndërsa në Turqi 2020 menaxhoi në mënyrë perfekte një pistë jashtëzakonisht të rrëshqitshme. Me vetëm një ndalesë dhe goma intermedium deri në fund, ai fitoi garën dhe siguroi titullin e shtatë botëror.
ALONSO DHE NORRIS, EKSPERIENCË DHE MËSIME
Fernando Alonso ka një histori të veçantë me Sepangun. Në vitin 2012, me një Ferrari jo favorit, spanjolli fitoi pas një gare të trazuar nga shiu, duke mposhtur edhe Sauberin e Serxhio Perezit. Edhe Lando Norris është një pilot për t’u mbajtur në vëmendje. Në Soçi 2021 humbi një fitore të mundshme pasi qëndroi në pistë me goma “slick” ndërsa shiu shtohej. Megjithatë, eksperienca e hidhur e ndihmoi të rritej dhe në Silverston 2025 ai tregoi maturi në kushte të ndryshueshme, duke fituar garën e parë në shtëpi.
KUJDES NGA ANTONELI
Italiani ende nuk ka zhvilluar një garë të madhe në shi në F1 dhe nuk e njeh pistën e Sepangut. Megjithatë, shiu nuk është i panjohur për të. Që në kategoritë e të rinjve, Antoneli ka treguar aftësi të veçanta në kushte me pak aderencë. Në Spa, në vitin 2023, fitoi një garë të “Formula Regional” në shi të fortë. Pas fundjavës së vështirë në Baku, ku u nis i 16-ti dhe përfundoi i pesti, një garë në shi në Sepang do t’i jepte mundësinë të tregonte një tjetër aspekt të talentit të tij.
Për Antonelin do të ishte një test i rëndësishëm: jo për t’u krahasuar menjëherë me specialistët më të mëdhenj të shiut, por për të treguar se kryesimi i tij në kampionat mund të mbështetet edhe në kushtet më të vështira të garës. Dhe me numrin 12 të Airton Senës në makinën e tij, një tjetër legjendë e pistave të lagura, një Sepang nën shi do të ishte padyshim një skenar simbolik.
