Deri më tani s’ka një konfirmim zyrtar nga policia për shkaqet e shpërthimit të fuqishëm të automjetit mbrëmjen e sotme në Gjirokastër. Sigurisht që është ende herët dhe policisë i duhet kohë për të kryer gjithë veprimet hetimore të nevojshme.
Dyshimet paraprake mbeten vetëm dy; vendosje eksplozivi në automjet ose bombula e gazit nëse mjeti kishte një të tillë. Sidoqoftë versionin final do duhet ta thonë ekspertët që po kryejnë hetimet. Policia reagoi shkurt pak pas ngjarjes duke konfirmuar shpërthimin dhe dy shtetas të plagosur që ndodheshin në makinë.
“Rreth orës 22:00, në bulevardin “18 Shtatori”, dyshohet se ka shpërthyer automjeti tip “Benz”, në pronësi të shtetasit Beqir Devolli, i cili ishte në lëvizje. Si pasojë e shpërthimit, kanë mbetur të dëmtuar shtetasit Beqir Devolli dhe Rigers Mela, të cilët ndodhen në spital, nën kujdesin e mjekëve”, thuhet në njoftimin e policisë.
Argjiroja.net mëson nga dëshmitarët okularë të ngjarjes se makina ka shpërthyer fillimisht përpara Gjykatës së Gjirokastrës dhe më pas ka vijuar për inerci lëvizjen derisa ka mbërritur përpara Drejtorisë Vendore të Policisë. Dy të plagosurit po marrin kujdes mjekësor në spital. Në gjendje të rëndë paraqitetit drejtuesi i automjetit Beqir Devolli.
Fatmirësisht nga shpërthimi nuk pati dëme të tjera përreth dhe të lënduar në njerëz. “18 Shtatori” është një nga lagjet më të populluara në Gjirokastër dhe në atë orë kur ndodhi ngjarja natyrisht që ka ende lëvizje në rrugë. ©Argjiroja.net
View this post on Instagram
