Për dekada me radhë, ajo u prezantua si një nga krijesat më misterioze të botës, duke nxitur debate mbi ekzistencën e sirenave dhe duke tërhequr mijëra kureshtarë.
Por e vërteta pas të famshmes “Sirena e Fixhit” ishte shumë më pak magjike: një mashtrim i ndërtuar me pjesë trupash kafshësh të ndryshme.
Ekzemplari i çuditshëm, që dukej si një përzierje mes njeriut dhe peshkut, u bë një sensacion gjatë shekullit XIX, kur u promovua si dëshmi e mundshme e krijesave misterioze që jetonin nën ujë.
Madje, në një kohë kur shkenca po përballej me teori të reja mbi evolucionin, disa e konsideruan atë si një të ashtuquajtur “hallkë të munguar” mes njerëzve dhe kafshëve ujore.
Por, sipas Jack Daly, lektor i shkrimit dhe retorikës në Universitetin e Kolorados në Boulder, sirena nuk kishte asgjë të jashtëzakonshme nga pikëpamja biologjike. Ajo ishte një krijim artificial, i realizuar duke qepur pjesën e sipërme të trupit të një majmuni të vogël me bishtin e një peshku.
“Sirena e Fixhit, duke kombinuar tiparet njerëzore dhe shtazore, folklorin dhe shkencën, spektaklin dhe empirizmin, tregon se si një farsë monstruoze frymëzoi debat të fortë intelektual në Amerikën e shekullit XIX”, shkroi Daly në një artikull të botuar në The Conversation.
Sirena u soll në Amerikë gjatë viteve 1800 nga showman-i i famshëm PT Barnum, i njohur për spektaklet e tij dhe aftësinë për të tërhequr publikun me ekspozita të pazakonta.
Ndryshe nga imazhi tradicional i sirenave të bukura të përrallave, kjo krijesë ishte e frikshme dhe kishte një pamje të deformuar.
Barnum e përshkroi ekzemplarin si një krijesë të vogël, të zezë, të tharë dhe të shëmtuar, me gojën hapur, bishtin e kthyer lart dhe krahët e ngritur, duke krijuar përshtypjen e një qenieje që kishte vdekur në agoni.
Megjithatë, pamja e saj nuk e pengoi suksesin. Përkundrazi, pretendimet se bëhej fjalë për një sirenë të vërtetë tërhoqën turma të mëdha vizitorësh dhe e kthyen ekspozitën në një fenomen të njohur përtej kufijve të SHBA-së.
Ekzaminimet e mëvonshme treguan se krijesa ishte një kombinim artificial i pjesëve të kafshëve të ndryshme. Trupi i saj ishte ndërtuar për të krijuar iluzionin e një qenieje gjysmë njerëzore dhe gjysmë ujore.
Edhe në autobiografinë e tij, Barnum përmend një episod ku kishte kërkuar mendimin e një natyralisti për autenticitetin e ekzemplarit.
Sipas rrëfimit të tij, eksperti kishte pranuar se nuk mund të shpjegonte se si ishte ndërtuar krijesa, pasi nuk kishte parë kurrë një majmun apo peshk me tipare të tilla.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
