Asambleja e Partisë Socialiste i ka mbyllur punimet. Në përfundim të saj pati vetëm një komunikim të shkurtër të Sekretarit të Përgjithshëm, Blendi Klosi, i cili shmangu pyetjen përse nuk u hodh në votim propozimi i Edi Ramës për përjashtim të Elisa Spiropalit.
Klosi tha në fund të deklaratës së tij se Elisa Spiropali vijon të jetë anëtare e Partisë Socialiste.
“Gjithsecili që kërkon të jetë pjesë e kontributit për këshillat bashkiakë dhe të jetë pjesë e platformës duhet të fillojë në mënyrë të strukturuar në çdo qendër urbane ose rurale punët për Shqipërinë. Ajo çfarë drejtuesit e zgjedhur kanë bërë në çdo vend dhe ajo që ne do t’u ofrojmë në garën e radhës, me drejtues të rinj të mbështetur nga PS.
Sa i përket drejtimit të Tiranës, u propozuan dy bashkëkryetarë në të gjitha 61 bashkitë, që me organizimin e ri do të shkojë në 46, edhe pse mbështetja partiake do të jetë e njëjtë, do të jetë nga dy bashkëkryetarë, nga Albana Koçiu dhe Ervin Demo.
Asambleja ishte për miratimin e platformës “Këshilltari i Bashkisë Sime”, procesin për fushatën elektorale dhe, natyrisht, për punët tona organizative. Spiropali është anëtare e partisë”, tha Blendi Klosi.
Më herët gjatë mbledhjes Rama kërkoi përjashtim të Spiropalit dhe avokatit të Erion Veliajt, Plarent Ndreca.
Kundër këtij propozimi të Ramës ka dalë Fatmir Xhafaj, i cili tha se le të konsiderohet kjo si ditë e parë e të shmanget masa e përjashtimit.
