Deputetja dhe drejtuesja politike e Partisë Socialiste për qarkun Gjirokastër, Mirela Kumbaro, zhvilloi një takim me socialistët e Asamblesë së zgjeruar të PS-së, ku në fokus ishte organizimi politik, sfidat e ardhshme dhe përgjegjësia për të forcuar komunikimin me qytetarët.
Përmes një postimi në rrjetet sociale, Kumbaro theksoi se viti 2027 do të jetë një vit me rëndësi të veçantë për vendin dhe për Gjirokastrën, jo vetëm për shkak të zgjedhjeve vendore, por edhe për përgatitjet që lidhen me Traktatin e Anëtarësimit të Shqipërisë në Bashkimin Europian.
Gjatë takimit, vëmendje e veçantë iu kushtua nevojës për një komunikim më të drejtpërdrejtë, më të qartë dhe më njerëzor me komunitetet, duke e kthyer angazhimin politik në një prani të vazhdueshme pranë qytetarëve. Sipas Kumbaros, ky është një prioritet që kërkon më shumë vëmendje ndaj problematikave të njerëzve, disiplinë në punë dhe përgjegjësi në përmbushjen e angazhimeve.
Në këtë drejtim, ajo nënvizoi rëndësinë e forcimit të skuadrës socialiste në të gjithë qarkun, me synimin për të qenë më pranë çdo komuniteti dhe për të ndërtuar një marrëdhënie të përditshme me qytetarët.
Mesazhi i Kumbaros vjen në kuadër të përgatitjeve të Partisë Socialiste për zgjedhjet vendore të vitit 2027, por edhe të një periudhe që pritet të shënojë një etapë historike në rrugëtimin europian të Shqipërisë, me nisjen e përgatitjeve për Traktatin e Anëtarësimit në Bashkimin Europian.









