Më 7 shkurt do të zhvillohen punimet për Asamblenë e Përgjithshme që këtë vit përkon me atë zgjedhore për Presidentin e FSHF-së dhe anëtarët e Komitetit Ekzekutiv. Fituesi për president zgjidhet me të paktën 44 vota që konsiderohet shumica e cilësuar. Në rast se mungon kjo gjë, atëherë në votimin e dytë përfshihen ata kandidatë që kanë marrë numrin më të madh të votave. Në këtë raund fiton kandidati me numrin më të madh të votave, pra, me shumicë të thjeshtë.
Nga 66 anëtarët e Asamblesë, 54 janë klube futbolli dhe 12 shoqata sportive si, për shembull, Shoqata e Trajnerëve, e Mjekëve Sportivë, Arbitrave të Futbollit, etj. Por, prej disa vitesh, disa klube kanë filluar të privatizohen. Nga ana tjetër, kemi ende klube në varësi të pushtetit lokal, pra bashki që administrojnë ekipet e futbollit. Sa i përket qarkut Gjirokastër, janë 6 vota në Asamblenë e FSHF-së. Kështu, të drejtë vote kanë Grigor Tavo, presidenti i Luftëtarit, Tërmet Peci, kryebashkiaku i Tepelenës, Durim Roshi, kryebashkiaku i Memaliajt, Klement Ndoni, kryebashkiaku i Këlcyrës dhe Niku Shupuli, kryebashkiaku i Përmetit. Vec tyre voton edhe Astrit Mema si kryetari i Shoqatës Rajonale Gjirokastër.
©ArgjiroLajm.net
