Më shumë pikë, më shumë gola të shënuar dhe më pak të pësuar se një sezon më parë. Luftëtari i drejtuar nga Hasan Lika po fluturon dhe është kthyer nga një ekip që rrezikonte mbijetesën, në një skuadër e cila me të drejtë pretendon Europën. Gjirokastritët janë aktualisht vetëm 2 pikë larg vendit të tretë që të çon në Europë dhe do të kërkojnë ta rrëmbejnë këtë pozicion që në fundjavë, në duelin spektakolar përballë Skënderbeut në Korçë. Nëse arrihet, do të ishte plotësisht i merituar, pasi edhe klasifikimi i përballjeve direkte mes skuadrave nga vendi i 2, deri te i 7, të cila pretendojnë Europën, sheh Luftëtarin si kryesues të këtij mini-kampionati.
Në 15 ndeshje direkte që kanë zhvilluar gjirokastritët, ata kanë arritur të sigurojnë 25 pikë, 3 më shumë sesa Kukësi që i ndjek, por duhet theksuar se verilindorët kanë zhvilluar një sfidë direkte më pak. Pastaj vijojnë të shkëputura Flamurtari, Kamza, Laçi dhe Partizani, të cilat për momentin gjenden shumë larg në këtë mini-kampionat të vogël që po tërheq më shumë vëmendjen në këtë seozn, ku lufta për titull është kthyer në formalitet.
