Teuta ka marrë një pikë të rëndësishme në Gjirokastër, duke ndalur në barazim një nga ekipet më në formë të Superiores, Luftëtarin. Një barazim ky që mund t’i ndihmojë durrsakët në misionin e mbijetesës. Kështu e cilëson edhe trajneri i Teutës, Begeja, teksa në një intervistë për “Supersport”, shprehet se ky ishte rezultati më i drejtë i takimit dhe mund të cilësohet si pozitiv.
“Për mënyrën si shkoi loja, barazimi ishte rezultati më i drejtë, pavarësisht se ne kishim 2-3 raste të mira për të kaluar në avantazh në fundin e ndeshjes. Kundërshtari na ka vënë shumë në vështirësi në fillimin e takimit, prandaj barazimi ishte rezultati më i drejtë. Ne kishim ardhur për rezultat pozitiv në Gjirokastër, ndërsa edhe barazimi mund të konsiderohet i tillë. Teuta nuk e ka luksin për të bërë një lojë sulmuese dhe duke parë elementet e kundërshtarit, kishim zgjedhur vetë këtë mënyrë loje.
Ndeshjen e ndërtuam në atë mënyrë që lojtarët të mos kishin markime një kundër një, duke dubluar kundërshtarët tanë, pasi Luftëtari ka disa futbollistë me kualitete të larta. Skuadra është e përkushtuar në stërvitje, nuk është merita ime por e skuadrës dhe duhet të vazhdojmë kështu”, është shprehur Begeja
