Luftëtari ka arritur të fitojë një takim të rëndësishëm në javën e 29-të të Superiores, teksa ka mposhtur me rezultatin 2-1 Laçin në duelin e drejtpërdrejtë të Europës. Në një intervistë për “Supersport”, Hasan Lika është shprehur se takimi ndaj Laçit duhej të ishte mbyllur më parë, por kjo nuk ka ardhur për shkak të besimit të tepruar të futbollistëve të Luftëtarit.
“Dua të them se ishte një fitore e rëndësishme ndaj një kundërshtari që zhvilloi një ndeshje shumë të mirë. Mund ta kishim mbyllur ndeshjen që më parë, megjithatë duhet të shohim edhe vlerat e kundërshtarit. Skuadra pas barazimit me Teutën i duhej një fitore me patjetër në ditën e sotme. Megjithatë u treguam të kujdesshëm dhe kemi marrë frenat e lojës ngadalësisht.
Pasi shkuam në rezultatin 2-0 disa futbollistë filluan të tregonin besim të tepruar te vetja dhe kjo na penalizoi. Futbollistë të caktuar si Abazaj dhe Bregun kur janë në ditë të mirë, tentojnë të zgjidhin gjithmonë situatat vetë. Beqiri ka pasur probleme në këto javë dhe kemi qenë gjatë kohës të kujdesshëm por do të tregohemi të vëmendshëm në vazhdimësi”, është shprehur Lika.
