Kristal Abazaj ka nënshkruar gjatë ditës së sotme një kontratë me klubin e Anderlehtit, duke hedhur një hap të rëndësishëm për karrierën e tij. Ky transferim ka ardhur në një mënyrë paksa të papritur për sulmuesin e Luftëtarit, por interesimi i klubit belg për futbollistin në fjalë vijonte prej disa kohësh. Në një prononcim për “Vip Sport”, menaxheri aktual i futbollistit, Elton Marini është shprehur se ka pasur dijeni të plotë për këtë transferim, pavarësisht se negociatat janë zhvilluar në fshehtësi, ndërsa takimi që ka vendosur këtë transferim të lojtarit është ai ndaj Skënderbeut.
“Atëherë transferimi i Abazajt në Belgjikë është realizuar në bashkpunim mes meje dhe agjencisë “Select Sport Managment” që është në pronësi të Shkumbin Qormetit. Kishte disa muaj që ishin vendosur kontaktet mes klubit dhe lojtarit, ndërsa takimi që ka vendosur përfundimisht transferimin e tij, ishte ndeshja Luftëtari-Skënderbeu. Në atë takim Abazaj ka arritur të realizojë dy gola dhe u pëlqye shumë nga drejtuesit belgë.
Më vonë janë zhvilluar në fshehtësi testet mjekësore dhe menjëherë pas tyre është arritur akordi. Gjithashtu zyrtarë të klubit të Anderlehtit kanë qenë të pranishëm edhe në “Elbasan Arena” për të ndjekur takimin e Shqipërisë ndaj Norvegjisë, por Abazaj nuk u aktivizua për asnjë minutë. Kontrata është 3-vjeçare dhe ka një opsion për vitin e 4-t. Ndërsa sa i përket shifrës që përfiton Skënderbeu, nuk është në autorizimin tim për ta thënë”, është shprehur menaxheri i futbollistit.
