Lojë e bukur, rezultate pozitive dhe një ekip i gjithi për t’u duartrokitur. Kjo është panorama që përshkruan në mënyrën më të mirë ekipin e Luftëtarit gjatë këtij sezoni, që tashmë është shumë pranë arritjes në Europë. Por për të plotësuar një “përallë të bukur”, protagonistët janë të shumtë, përveç aktorëve kryesorë që përmenden shpeshherë. Një prej pikave të forta ku është mbështetur Lika në këtë sezon, ështe edhe mesfushori Eduart Rroca. Duke folur për Vip Sport, Rroca ka konfirmuar interesimin e ekipit grek Pas Janina për kartonin e tij.
“Dua të konfirmoj këtë interesim nga ana e Pas Janinës, pasi jam informuar edhe nga ana e klubit, megjithatë nuk ka ende asgjë konkrete. Në fundin e sezonit do të ulem bashkë me presidentin dhe do të vendosim se çfarë do të bëjmë për mirën e të dy palëve. Klubi ka kërkesat e veta financiare nga kartoni im dhe shpresoj të gjejmë gjuhën e përbashkët për këtë transferim apo edhe të ndonjë oferte tjetër nga jashtë, sepse të gjithë kanë dëshirë të provojnë veten sa më lartë të jetë e mundur”, është shprehur Rroca.
