Një nga ndeshjet më të tensionuara të fundjavës në Superiore ishte ajo mes Kamzës dhe Luftëtarit, pas të cilës kishte zëra se gjirokastritëve iu kërkua që të toleronin në këtë duel. Vetë drejtori sportiv, Gentian Nora, ka pohuar për TVSH se kishte pasur momente kur persona të caktuar ua kishin kërkuar një gjë të tillë gjatë takimit, si dhe kishin tentuar që të ushtronin dhunë ndaj tyre.
“Sa i përket ngjarjes, ajo ka ndodhur jo ne korridorin e stadiumit, por në dalje të tribunës kryesore. Në momentin që po largoheshim për pushimin mes pjesëve janë afruar katër persona dhe njëri prej tyre më ka kërkuar që t’i linim ndeshjen dhe ka tentuar të më godasë. Në këtë moment ka ndërhyrë policia dhe e ka larguar.
Më pas është afruar një person tjetër, i pesti i cili tha ‘jam i afërm i Naimit’ dhe u kërkoi atyre të largoheshin dhe tha ‘vazhdoni pa problem’. Duke parë këtë situatë të tensionuar pasi këto katër persona po qëndronin në hyrje, policia na largoi dhe na vendosi në tribunën e tifozëve tanë ndërsa duhej të qëndronim në tribunën VIP, pasi ishim në listën e personave në këtë tribunë”, tregoi Nora.
Ndërkaq, ai e ka cilësuar si pozitive paraqitjen e gjyqtarit kryesor të kësaj ndeshje, Enea Jorgji, duke e cilësuar edhe gabimin te penalltia, si njerëzor dhe jo keqdashje për të ndëshkuar njërën skuadër apo tjetrën.
“Në gjykimin tim, lojtari më i mirë në fushë ishte arbitri i cili diti të shmangë tensionet në një ndeshje të rëndësishme për të dy ekipet, duke nxjerrë një ndeshje fair-play. Mendoj se në momentin e penalltisë ka gabuar, gjithsesi nuk shikoj ndonjë tendencë për të dëmtuar Luftëtarin apo Kamzën në këtë ndeshje. Thjesht ishte rast i vështirë për të gjykuar në dinamikën e tij pasi ishte një përplasje e shpejtë mes lojtarëve”, shpjegoi Nora i cili për disa vite ka qenë vetë gjyqtar i regjistruan në FSHF.
