Luftëtari arriti të barazonte ndaj Partizanit edhe pse ishte në disavantazh 0-2. Trajneri i Luftëtarit, Hasan Lika është shprehur i kënaqur me reagimin e skuadrës në pjesën e dytë. Sa i përket Europës, Lika u shpreh se ende nuk kanë filluar përgatitjet pasi nuk është siguruar ende Europa.
“Ishte pozitiv reagimi i skuadrës në pjesën e dytë pasi zhvilluam një ndeshje të mirë përballë një skuadre që na vuri në vështirësi. Luajtëm me më shumë dëshirë në pjesën e dytë dhe e kërkuam më shumë rezultatin, gjë e cila u pa edhe në fushë në krahasim me pjesën e parë.
Na duhet të luftojmë në çdo ndeshje pasi shkojmë në Kukës dhe kemi një ndeshje të vështirë sepse së bashku me Skënderbeun, ata kanë bërë historinë në arenën europiane. Ne punojmë gjithmonë në goditjet standarde por kemi probleme me shtatlartësinë e lojtarëve. Kemi probleme edhe me goditjet direkte në krahun tonë. Mund të them se kemi probleme në aspektin mbrojtës por edhe në sulm. Meqë është fundi i kampionatit nuk mendoj se do të na prishin shumë punë.
Skuadra për Europën? Për Europën nuk kemi filluar ta projektojmë skuadrën pasi nuk e kemi siguruar akoma. Kur ta sigurojmë do të fillojmë të mendojmë. Për ne çdo mungesë është e rëndësishme por edhe çdo lojtar që luan është i rëndësishëm”, u shpreh Hasan Lika.
