Nuk e ka pezmatuar aspak humbja në Gjirokastër trajnerin Ilir Daja, pasi kampionati është mbyllur tashmë edhe në Korçë pritet vetëm festa e titullit, siç ka thënë edhe vetë trajneri kryeqytetas. Daja u shpreh se lojtarët duhet të vënë në funksion të grupit vlerat e tyre individuale. Tani shpreson që të fitojë Kupën e Shqipërisë në finalen me Laçin. Pas ndeshjes, trajneri i Skënderbeut tha:
“E kam shprehur se lojtarët e Skënderbeut janë cilësorë. Nuk ua ka dhuruar njeri ardhjen e tyre te Skënderbeu. Kanë cilësi individuale dhe këto cilësi duhet t’i shprehin në funksion të grupit. Nuk kemi presionin e rezultatit dhe kam marrë një informacion më të saktë për lojtarët. E kemi mbyllur kampionatin dhe presim të festojmë të mërkurën.
Kupa? Unë kam bërë me pjesën kryesore të ekipit në “Tropikal” stërvitje ekstra, sepse fokusi ynë është përqendruar te Kupa, veç vëmendjes së lojtarëve të rinj. “Qershia mbi tortë” do të ishte kupa për këtë sezon fantastik. Paralelisht, është një ambicje personale, sepse kam qenë dy herë në gjysmëfinale dhe në finale vjet me Skënderbeun. Këtë trofe duam t’ia sjellim Korçës, sepse e meriton,. E meritojmë edhe ne, sepse kemi bërë një sezon shumë të mirë.”
