Gjatë ndeshjeve europiane Luftëtari nuk do të ketë në përbërje dy yjet e tij, Kristal Abazajn dhe Dejvi Bregun, ndërkohë që zyrtarisht i larguar është edhe portieri Athanasopulos. Këto janë ndryshimet e deritanishme të gjirokastritët, por duket se ato do të vazhdojnë. Ka mbetur pezull çështja e trajnerit Hasan Lika, me shumë mundësi largimi nga stoli gjirokastrite, pasi drejtuesit e klubit po kontaktojnë me trajnerë të huaj. Po ashtu, edhe grupi i lojtarëve pritet të pësojë ndryshime të tjera.
Titullarë si Rroca, Shkurtaj dhe Xhekson kanë pasur oferta, kryesisht nga Greqia. Nëse largohen edhe ata, i takon që Luftëtari të humbasë gjysmën e formacionit dhe do të jetë e vështirë të bëhet zëvendësimi i duhur para ndeshjeve të Europa League. Presidenti Grigor Tavo ka thënë disa herë se do të afrohen lojtarë me më shumë kualitet për një përfaqësim dinjitoz në Europë, por ende asgjë konkrete. Ndoshta ata që do të vijnë mund të kenë vërtet kualitet, por vështirë që Luftëtari të ketë harmoninë në lojë si në sezonin e fundit.
