Luftëtari do të jetë skuadra e parë mes atyre të Superiores që do të zbresë në fushën e lojës për të luajtur ndeshjen e saj në Ligën e Europës. UEFA ka konfirmuar zyrtarisht oraret e ndeshjeve të vajtjes të turit të parë eliminator për ekipet shqiptare dhe do të jenë pikërisht gjirokastritët ata që do të jenë të parët që do të zbresin në fushë.
Luftëtari luan në 12 korrik, ora 16:45 me orën tonë sfidën në Letoni përballë Ventspils, në stadiumin “Ventspils Olimpiskais Centrs”. Atje, gjirokastritët do të kërkojnë të sigurojnë një rezultat i cili do t’i mundësojë që ndeshjen e kthimit të synojnë kualifikimin e mëtejshëm.
Pas tyre, në orën 17:30, në Tiranë, në “Selman Stërmasi” do të luajë Partizani kundër Mariborit, padyshim një kundërshtar shumë i fortë për të kuqtë. Ata e zhvillojnë këtë duel në një orar të tillë për faktin se ndriçimi i impiantit nuk plotëson standardet e UEFA-s, pra nuk d të ketë ndriçim artificial.
Ndërkohë, i fundit në fushën e lojës zbret Laçi, i cili në 19:00 në orën tonë, do të luajë në stadiumin “Antonis Papadopoulos” për të diskutuar me Anorthosis kualifikimin e mëtejshëm.
