Skuadra e Luftëtarit do të drejtohet në ndeshjen e saj të parë historike në Ligën e Europës nga një gjyqtar mjaft i veçantë. UEFA ka caktuar për sfidën që luhet në Letoni të enjten e ardhshme gjyqtarin qipriot Vasilis Dimitriou. E çuditshmja në këtë mes është se 41-vjeçari Dimitriou është një gjyqtar ndërkombëtar që nga viti 2012 dhe që atëherë në total në Kupat e Europës ka drejtuar plot… 5 ndeshje. UEFA i cakton atij vetëm një ndeshje në vit në Kupat e Europës, në turet e parë të Ligës së Europës, ndërsa e ka përdorur më shumë në aktivitetet e moshave, duke filluar nga U17, për të përfunduar me U21.
Në të kaluarën, qiprioti ka qenë dy herë në Shqipëri, fillimisht për të drejtuar U21 në ndeshjen që Shqipëria fitoi 2-0 përballë Lihtenshtejnit, e më pas për të drejtuar një ndeshje të Ligës së Europës, atë që Teuta humbi me shifrat 1-0 përballë Kairat Almati. Vëzhguesi i katërshes së gjyqtarëve qipriotë është bjellorusi Alieh Çjukun, ndërsa delegat i UEFA-s është irlandezi Denis Kruiz.
