Një vit pas kapjes së 1.3 ton kanabis në Kavajë, Prokuroria për Krime të Rënda ka dërguar për gjykim procedimin penal në ngarkim të 5 personave të cilët akuzohen për trafikim të lëndëve narkotike. Njëri prej të arrestuarve, Kejvi Hajdari është djali i ish-shefit të krimeve në Gramsh, Artur Hajdari.
Në përfundim të hetimeve, organi i akuzës ka arritur në konkluzionin se të dyshuarit Joni Sadikaj, Kejvi Hajdari, Nertil Shehu, Roland Hysenbelliu dhe Skerdi Sina kanë kryer të gjitha veprimet për trafikimin drejt Italisë, nëpërmjet detit të lëndës narkotike në sasinë prej 1359 kg trafikim. Dy prej të arrestuarve janë nga Tepelena: Joni Sadikaj dhe Skerdi Sina.
