Biznesmeni grek Kristos Kuro, i cili prej 13 vitesh ndante jetën mes Gjirokastrës dhe Janinës ka ndërruar jetë në moshën 70-vjeçare, pas një sëmundje të rëndë. Familjarë, miq dhe bashkëpunëtorë të tij të shumtë nga Greqia dhe Shqipëria i kanë dhënë sot lamtumirën në fshatin e tij të lindjes, Qefalovrisi. Kristo Kuro ishte një investitor i rëndësishëm në Shqipëri me kompaninë ‘Partner Ballkanik-Amita’, ku janë të punësuar një numër i konsiderueshëm njerëzish nga Gjirokastra, Libohova dhe Dropulli. “Amita” u krijua në vitin 1983 në Greqi nga kompania CCHBC (Coca-Cola Hellenic Bottling Company).
Në Shqipëri, “Amita” u prezantua rreth vitit 1992, duke zënë vendin e parë në preferencat e konsumatorëve. Në vitin 2005, CCHBC i besoi kompanisë ‘Partner Ballkanik’, në të cilën ishin edhe investirorë shqiptarë, prodhimin e produkteve të saj, duke bërë kështu të mundur ndërtimin e një fabrike moderne në Libohovë. Produketet me cilësi të lartë janë vlerësuar dhe çertifikuar ndërkombëtarisht me ISO 9001:2008 dhe HACCP.
Ndarja nga jeta e Kristo Kuros nuk është një lajm i keq vetëm për familjen e tij, por edhe për biznesin shqiptar. Kompania që ai ngriti në vendin tonë është një model suksesi për çdo investitor tjetër, vendas apo të huaj, që kërkon të bëjë biznes dhe të ndihmojë zhvillimin ekonomik. ArgjiroLajm.net i shpreh ngushëllimet familjes së tij, të afërmve, miqve dhe gjithë bashkëpunëtorëve.
© ArgjiroLajm.net
