Milosh Koshtiç ka përjetuar sot një debutim shumë të çuditshëm në ndeshje zyrtare në drejtimin e Luftëtarit. Tekniku i skuadrës gjirokastrite ishte afruar që të ndihmonte klubin të bënte hapin e radhës dhe të tregonte vlerat e saj në Europë.
Por në pjesën e parë, çfarëdo që kishte në mend trajneri slloven as që u pa në fushën e lojës. Ekipi i tij gaboi thuajse gjithçka, jo vetëm në ndërtimin e lojës, por edhe në ndalimin e kundërshtarëve dhe pësonte me lehtësi gola të njëpasnjëshëm.
“Çfarë po ndodh kështu”, ishte ulërima e tij në anglisht pasi ekipi nxori topin nga rrjeta për herë të tretë, për të zgjuar skuadrën që përsëri vazhdoi të mos jepte shenja jete dhe gaboi gjithçka të mundshme edhe në vazhdimësinë e pjesës së parë duke pësuar dy gola të tjerë.
Në pjesën e dytë, situata e gjirokastritëve u përmirësua disi sa i përket lojës, por Koshtiç dukej shumë i tensionuar. Ai filloi të kontestonte çdo vendim të gjyqtarit kryesor, me të cilin shpesh kërkoi shpjegime për vendimet e tij, si dhe në disa raste protestoi edhe para pankinës kundërshtare për ndërhyrjet e rënda të lojtarëve vendas.
Në një moment, ai ishte i pakënaqur edhe me djemtë që kthenin topat në fushën e lojës, ndërsa në momentin e zëvendësimit të Ramadanit, shkëmbeu disa fjalë edhe më këtë të fundit duke i kërkuar llogari kapitenit për atë që kishte ndodhur në fushën e lojës. Me siguri, jo debutimi që priste tekniku slloven i cili që tani nuk ka lënë një përshtypje aq të mirë te tifozeria gjirokastrite.
