Fitorja 5-0 ndaj Luftëtarit në ndeshjen e parë nuk ka qetësuar trajneri i Ventspils, Dejan Vukiçeviç, i cili mendon se ekipi i tij nuk e ka ende të sigurt kualifikimin dhe duhet shumë kujdes në ndeshjen e kthimit që luhet në Shqipëri. Pas duelit të sotëm, ai ka deklaruar se kishte përgatitur në mënyrën më të mirë këtë sfidë pasi dinte gjithçka për kundërshtarin, por edhe se priste më shumë prej tij në Shqipëri.
“Kemi kohë që përgatitemi për këtë ndeshje. Ne dinim shumë gjëra për kundërshtarët, kishim informacion të detajuar. Gjithçka ka shkuar mirë, falë përgatitjeve që kemi bërë. I thashë skuadrës në pushimin e ndeshjes se na priste një lojë tjetër dhe ashtu ndodhi. Gjatë pjesës së dytë, ne luajtëm më qetë që të mos dëmtoheshim apo të merrnim kartonë të verdhë.
Kundërshtari kontrolloi më shumë topin, gjë që ishte normale pasi kështu e planifikuam ne. Shënuam 5 gola, që nuk ndodh shpesh në Europë. Por ndonëse kemi fituar 5-0, ndeshja e kthimit do të jetë e vështirë. Duhet të bëhemi gati për të”, tha trajneri para gazetarëve.
