Premiera e ‘Sokaku i të Marrëve’ mbushi mbrëmjen e sotme Odeonin e Gjirokastrës si asnjëherë më parë. Publiku ndoqi për rreth dy orë interpretimet fantastike të Ansamblit të Këngëve dhe Valleve Popullore. Një ditë më parë ‘të marrët’ nisën festën në shtëpinë e Skëndulatëve.
E pranishme në këtë event ishte edhe ministrja e Kulturës, Mirela Kumbaro. Kalendari turistik veror 2018, hartuar nga Ministria e Kulturës, në bashkëpunim me institucionet artistike në vend, TKOB, AKKVP, Teatri i Kukullave, Cirku Kombëtar, AQSHF dhe skenën e pavarur, bën bashkë trashëgiminë dhe kulturën, me gjithëpërfshirje nga Jugu në Veri, duke i kthyer skenat e hapuara të trashëgimisë dhe sheshet e qyteteve në skena artistike, në një komunikim të gjallë me publikun.
Kalendari përfshin rreth 70 shfaqje në zonat bregdetare nga Velipoja në Dhërmi, nga Shëngjini në Korçë, nga Shkodra në Ksamil e Gjirokastër.
