Instituti SME Albania që mbështet sipërmarrësit e vegjël dhe të mesëm bëri sot një donacion në Tepelenë. Rreth 250 familje në nevojë të këtij qyteti përfituan ndihma ushqimore. Për të shpërndarë pakot pranë zyrave të Bashkisë Tepelenë, ishin të pranishëm përfaqësuesit e SME Albania, Daniel Guçe dhe Elton Shametaj.
Në fjalën përshëndetëse para banorëve, Guçe tha se ky është një kontribut modest, që natyrisht nuk zgjidh në mënyrë përfundimtare nevojat e këtyre familjeve, por mbetet një përpjekje serioze, e cila duhet të shërbejë si shembull pozitiv edhe për organizata të tjera e akoma më shumë për kompanitë e biznesit, që kurrsesi nuk duhet të harrojnë përgjegjësinë sociale.
“SME Albania në bashkëpunim me ‘Rotary Tirana West’ dhe z. Ilirjan Bushati e nisi me Tepelenën këtë fushatë donacionesh, për të vijuar edhe me qytete të tjera. Më shumë se gjithçka tjetër, kjo ne po bëjmë sot ka një vlerë simbolike dhe duhet të shërbejë si një shembull i fortë për biznesin dhe shoqërinë në tërësi. Të ndihmojmë njerëzit në nevojë, është një detyrim i joni i përbashkët. SME Albania si një institut i ri, do të vijojë edhe në të ardhmen të mbështesë nisma të tilla. Ju falenderoj që keni ardhur dhe shpresoj ta mirëprisni këtë kontribut’, u shpreh Guçe.
SME Albania ka rreth dy vjet që është themeluar. Ky institut ofron një platformë edukimi dhe trajnimi për biznesin; furnizon me njohuri e informacion sipërmarrësit dhe i mbështet në arritjen e sukseseve në aktivitetet e tyre. Në pranverë të këtij viti, SME Albania fitoi çmimin e parë në Europë si policymaker’s choice në “Good Practice Forum 2018”. Ndërkohë në fillim të këtij muaji realizoi me sukses për të dytin vit radhazi Akademinë Verore të SME-ve.
© ArgjiroLajm.net
