Nuk ka ende një njoftim zyrtar, por mediat rumune bëjnë të ditur se UEFA ka nisur hetimet për ndeshjen e Luftëtarit ndaj Ventspils, bashkë me dy sfida të tjera të cilat janë sinjalizuar nga kompanitë e basteve në botë si të dyshimta.
“Fanatik.ro” ka bërë të ditur se ndeshjet e turit të dytë në Ligën e Europës që kanë tërhequr vëmendjen e organizatës ndërkombëtare janë duelet Rio Ave Jagellonia si dhe Atalanta-Sarajevo, ndërsa në turin e parë po hetoheshin duelet mes Luftëtarit dhe Ventspils.
Sfida e parë e skuadrës shqiptare përfundoi me fitoren 5-0 të letonezëve në fushën e tyre ku masakruan gjirokastritët që në pjesën e parë të ndeshjes. Ndërkohë, në ndeshjen e kthimit, ekipi gjirokastrit barazoi 3-3 por u përball me akuza të shumta nga çdo vend i botës për manipulim të rezultatit për shkak të luhatjes së çuditshme të koeficienteve si dhe të sjelljes së futbollistëve në fushë, sidomos në momentin e golit të barazimit 3-3.
Sa i përket ndeshjeve mes Jagellonia dhe Rio Ave, dyshimet kanë lindur pasi në Polonia ndeshja përfundoi 1-0 për vendasit, kurse në Portugali nisi një festival i pazakontë golash me rezultatin përfundimtar 4-4.
E njëjta gjë edhe për duelet mes Atalantës dhe Sarajevos. Në Itali, dueli i parë u mbyll me shifrat 2-2, pasi italianët kryesonin 2-0 por pësuan 2 gola me të vetmet gjuajtje në portë që bënë kundërshtarët.
Ndeshja e kthimit në Bosnjë Hercegovinë ishte krejtësisht ndryshe, pasi Atalanta fitoi me lehtësi duke shënuar 8 herë në portën kundërshtare. Të gjitha palët dyshohen për marrëveshje mes tyre me qëllimin për të siguruar rezultatet në favor të basteve sportive./tema
