Autoriteti Kombëtar i Ushqimit në Gjirokastër njoftoi sot për bllokimin e një sasie të madhe mielli në Kakavijë, pasi nuk kishte fletë analizë që konfirmon sigurinë e produktit. Ishin plot 27 ton miell që do shitej në tregun shqiptar. Sigurisht që është një lajm i mirë sa herë autoritetet shtetërore kujdesen për sigurinë e konsumatorit. Por nëse lexon njoftimin e AKU-së, në asnjë fjalë nuk përmendet emri i subjektit që tentoi ta fuste në tregun shqiptar këtë sasi të madhe mielli me origjinë të dyshimtë.
Kush është tregtari apo kompania, për llogari të së cilës u bllokua kjo sasi kaq e madhe? Pse AKU Gjirokastër zgjedh ta mbajë sekret emrin e këtij subjekti, kur nuk vepron kështu në raste të tjera? Ju kujtojmë në rastet kur bllokohen pika të therjes dhe tregtimit të mishit jashtë standardeve, AKU bën publik emrin e subjektit, si dhe gjobën, nëse është vendosur një e tillë. Për shembull para disa kohësh u bllokua një dyqan mishi në lagjen ‘Pazar’ të Gjirokastrës.
Njoftimi i AKU shoqërohej edhe me emrin e subjektit përkatës. Kështu u veprua edhe në Përmet para disa javësh kur u bllokua një tjetër pikë e paligjshme e therjes së mishit. Ndërkohë kur vjen puna tek 27 ton miell me origjinë të dyshimtë, AKU i kursen publikut emrin e kompanisë apo tregtarit. Përse këto dy standarde? Të kuptohemi, nuk është qëllimi të linçojmë një kompani apo një tregtar, por publiku meriton t’i njohë subjektet që shesin produkte me siguri të dyshimtë.
Sikundër AKU bën publik emrin e një tregtari mishi që shet jashtë kushteve higjeno-sanitare, ka detyrimin të informojë konsumatorët edhe për subjektin që fut në Shqipëri 27 ton miell pa çertifikatë që konfirmon sigurinë e produktit. Më poshtë dy njoftimet e AKU Gjirokastër. I pari për miellin e bllokuar në Kakavijë, ku mungon emri i subjektit. I dyti, për dyqanin e bllokuar në Gjirokastër, ku jepet emri i subjektit.
© ArgjiroLajm.net
